Суперҳужумчи "Ливерпуль"нинг таклифини кутяпти

"Ньюкасл" ҳужумчиси Александер Исак клубини ўзгартириш ниятида ва "Ливерпуль"га ўтишни истаяпти.

Журналист Бен Жейкобснинг хабар беришича, швециялик ҳужумчи жамоа раҳбариятига бошқа клубларнинг таклифларини кўриб чиқиш истагини билдирган. Мерсисайдликлар яқинда Юго Экитикени сотиб олганига қарамай, Исакка бўлган қизиқишни давом эттирмоқда.

Манба маълумотларига кўра, футболчи "Ливерпуль"дан таклиф олишдан мамнун бўлади, бироқ томонлар шартнома шартларини келишиб бўлгани ҳақидаги хабар ҳақиқатга тўғри келмайди. Айтилишича, "қизиллар" Экитике бўйича келишув якунланишидан олдин футболчининг вакиллари билан боғланиб, швециялик футболчининг трансфери учун Британия футболи тарихидаги рекорд суммани тўлашга тайёрлигини билдирган.

Шу билан бирга, "Ньюкасл" ҳамон Исак билан шартномани узайтиришга умид қилмоқда. Аммо асосий тўсиқ - футболчининг маош бўйича кутаётган талаблари бўлиб турибди.