Сергей Лушчан: "Ақллилар ҳам бор, бизга нима қилишни ўргатадиган. Уларга қулоқ солмайман"

Ўзбекистон Суперлигасининг 17-туридан ўрин олган “Навбаҳор” – “Сўғдиёна” (1:1) учрашувидан кейинги матбуот анжуманида мезбонлар бош мураббийи Сергей Лушчан иштирок этиб, ОАВ ходимларининг саволларига жавоб берганлиги ҳақида клуб матбуот хизмати баён қилди. 

- Бугунги ўйин борасидаги фикрингиз?

- Учрашув биз учун жуда қийин кечди. Айниқса, ҳужумда ҳеч нарса ўхшамади. Бунга нима сабаб бўлаётганлигини таҳлил қиламиз. Меҳмонлар ҳам кўп вазиятлар яратишди, дея олмайман. Бугунги баҳсда тенг кучли жамоалар кураши гувоҳи бўлдик. Яккакурашлар кўп бўлди, балки ютмаганимизга майдон халақит бергандир, бир нарса дея олмайман. Шундай бўлса-да,  футболчиларга раҳмат айтдим.

- Русланбек Жияновнинг захирага олинишига нима сабаб бўлди?

- Чунки у биз кутган ўйинни намойиш эта олмади. Жиянов ва Мирсаидов жамоамиз билан асосий йиғинда бўлишмади, уларнинг иккиси деярли машғулот ўтказишмади. Бир ой ҳеч нима қилмасдан фақат дам олишди. Худди шунингдек, бошқа футболчилар ҳам машғулотларда тўлиқ иштирок этишмади. Болтабоев бир ойни ҳужжатларини тайёрлаш билан ўтказди. Хуллас, ҳозирги таркибда машғулотда қатнашмаган 7-8 нафар ўйинчи ўйнаяпти. Шунинг учун зўрға дуранг қайд этаётганимиздан ҳам хурсандман. Жамоада нима бўлаётганини билиш учун унинг ичида бўлиш керак. Мен жамоа ичида бўлганим учун ҳаммасини биламан.

- “Навбаҳор” қаторасига учта ўйиндан буён ғалаба қозона олмаяпти. Бунинг сабаби нимада? 

- Бу жамоанинг функционал ҳолати билан боғлиқ. Биринчи давра охирларида 10 нафарга яқин ёшларни мажбуран асосий таркибга ўтказдик, чунки захирамизда ҳеч ким қолмаганди. Мана ҳозир кўряпсиз, ёшлар ўзларини кўрсатишга ҳаракат қилишяпти. Биз режа бўйича ишлашда давом этяпмиз. Албатта, ақллилар ҳам бор, бизга нима қилиш кераклигини ўргатадиган. Лекин мен уларга қулоқ солмайман.

- Бугунги мухлислик ва перформанс сизга ёқдими? 

- Тўғриси, ўйин пайтида диққат эътиборимни фақат майдонга ва футболчиларнинг ҳаракатларига қаратаман. Баъзан бақиришади, аммо мен эътибор бермайман, баъзан тушунмайман ҳам. Мухлислик ҳар доим жамоага нисбатан бир хил бўлиши керак. Ютганда қарсак чалиб, ютқазганда сўкиш фан-клубнинг иши  эмас. Бу мухлислик маданиятига умуман тўғри келмайди.

- Янги келган ўйинчилар ҳақида нима дея оласиз?

- Уларнинг жамоамизга келганига энди 10 кун бўлди. Озроқ вақт керак, кейин улар ҳам ўзларини кўрсатади. Бу йил бизга осон бўлмаяпти, бошидаги 7 та турни жуда қийналиб ўтказдик. Мен янги келганларга тўлиқ ишонаман.

- Кетганларни ушлаб қолса бўлармиди? 

- Ижарага кетганлар бўлди ҳамда уларни ўзимиз қўйиб юбордик. Кимгадир кўпроқ маош таклиф қилишди ва у кетди. Бу нормал ҳолат. Яхши таклиф бўлса футболчи кетади.

- 25 август куни яна “Сўғдиёна”га қарши баҳс олиб борасиз. Ўша ўйинда ўзгаришлар бўладими?

- Футболчилар ўзгармайди, 20 нафар ўйинчи қайдномадан жой олади. Лекин қанақа ўйин кўрсатишимизни вақт кўрсатади.