Рубен Аморим МЮнинг ҳужумдаги муаммолари ҳақида гапирди

"Манчестер Юнайтед" бош мураббийи Рубен Аморим жамоа ҳужум чизиғидаги муаммолар борасида фикр билдирди:

"Биз эътиборни ўзимизда бор футболчиларга ёрдам беришга қаратяпмиз. Расмус Хойлунд сўнгги ўйинда гол урди. Унда иқтидор борлиги кўриниб турибди. Жошуа Зиркзее ҳам иқтидорли, Чидо Оби-Мартин ҳам шундай.

Биз футболчиларни ривожлантиришимиз керак, аммо ҳар бирини алоҳида яхшилаш учун жамоавий ўйинни такомиллаштириш талаб этилади. Биз ҳозирча ҳужумчиларга ёрдам бера оладиган тўлиқ уйғун жамоа эмасмиз. Голлар етишмаяпти ва бу бизга кўп очколарга тушди.

Хойлунд ҳақиқатдан ҳам қаттиқ меҳнат қиляпти. Айрим голларимизда, айниқса ушбу турнирда, у ўз ҳаракатлари билан муҳим роль ўйнади. Менимча, у ҳозир яхши спорт формаси ва кайфиятда, ажойиб ўйин кўрсата олади" — дея таъриф бериб ўтди португалиялик мутахассис.

Бугун "Манчестер Юнайтед" Бильбаода Европа лигаси ярим финали доирасида "Атлетик"ка қарши илк ўйинни ўтказади.