“Рома”: Яна кетадиганлар бор!

Рим клуби қишки трансферлар даврида анча фаол ишляпти. Ҳозирча, спорт директори Тьягу Пинто бош мураббий Жозе Моуриньога тўғри келмаган ўйинчиларни бошқа жамоаларга ўтказишда анча самарали меҳнат қилмоқда.

Бундан ташқари, римликлар анча номдор ва катта тажрибага эга икки футболчини ўз таркибига қўшиб олгани ҳам эътиборга молик масала.

Клуб президенти Дэн Фридкин аслида янги ўйинчиларни олиб келишга қарши эмас. Лекин у Тьягу Пинтога ҳар бир келадиган футболчини ҳозирги таркибдан бошқа бир ўйинчи ўрнига олишни талаб қилмоқда. Шу тариқа, у бир ўқ билан икки қуённи уряпти.

Римдан кетадиган ўйинчилар орасида Амаду Диаваранинг номи кўп янграяпти. Африкалик таян ярим ҳимоячисига “Валенсия” харидор бўлмоқда.

Бундан ташқари, франциялик Жордан Веретуга анча жиддий клублар – “Наполи” ва “Тоттенхэм”дан чорлов бор. Испания чемпионати вакили “Кадис” эса римликлар таркибидаги испан ҳужумчиси Карлес Перезга харидор.

Бу трансферлар бир неча кун ичида амалга оширилиши мумкин.