“Реал” юлдузининг қайси ҳолатда жамоадан кетиши аниқ бўлди

“Реал” бугунги кунда жаҳон футболида энг кучли таркибга эга жамоалардан бирига айланган. Айниқса, “Қироллик клуби”нинг ҳужум чизиғида юқори савияли ўйинчилар тўпланиб қолди.

Ёзда таркибга Клиан Мбаппе ва Эндрик қўшилганидан кейин Родригонинг бошқа жамоага ўтиши ҳақидаги маълумотлар чиқа бошлаган эди. Энди бразилиялик ўйинчи масаласи яна биринчи планга кўтарилмоқда.

Transfer News Live нашрининг ёзишича, Родриго “Реал”да қачонгача ўйнаши ҳақида бир қарорга келиб бўлган. Манбага кўра, 23 ёшли ҳужумкор футболчи “Реал”нинг муҳим ўйинчиси эканини ҳис қилар экан, клубдан кетмайди. Агар унинг ўйин вақти кескин камайсагина бошқа клубга кўчиб ўтиши мумкин.

Аслида Родригога харидорлар етарли. Яқинда “Ливерпуль” бу ўйинчи учун 100 миллион евро тўлашга тайёрлиги ҳақида ахборот тарқатилган эди.