"Рақиб камчиликда қолгач, орадаги фарқ яққол билинди" ёхуд Вадим Абрамов жамоаси сенсацияга йўл қўймади

Ўзбекистон Кубогининг 1/8 финали доирасидаги илк беллашув Самарқандда ўтказилди. Унда майдон эгалари - "Динамо" клуби биринчи лига иштирокчиси - гуруҳда шов-шув кўтарган ҳолда "Андижон" ҳамда "Сурхон"ни мағлуб этиб, кейинги босқич масаласини ҳал қилган Қаршининг "Лочин" жамоасига қарши баҳс олиб борди.

Бу сафар "Лочин"дан сенсацион натижа кўрмадик ва Вадим Абрамов жамоаси рақибини ортиқча қийинчиликсиз таслим қилди - 5:0.

"Динамо" матбуот хизмати учрашувдан кейин мезбонлар бош мураббийи Вадим Абрамовнинг матбуот анжуманида билдирган фикрларини тақдим қилди. 

«Жамоа тезкор гол уришга интилди ва натижада ўйин нисбатан осонроқ кечди. Бугун хотиржамлик билан ғалаба қозондик. Ўйиндаги тезкор голлар ва четлатиш йирик натижага сабаб бўлди. Рақиб камчиликда қолгач, орадаги фарқ яққол билинди. Шунга қарамай, рақиб жамоанинг ҳаракатларини алоҳида қайд этишим керак.

Хет-трикка эришган Миржаҳон Мираҳмадов ва Фирдавс Абдураҳмоновнинг ўйини ҳақида? Улар ўз ишларини қилишди. Ҳар икки футболчи ҳам ҳужумчи, гол уриш уларнинг вазифаси. Бу голлардан кейин уларда ўзига бўлган ишонч ошишига умид қиламан, ҳар икки ўйинчи учун ҳам хурсандман.

Ратиньонинг захирага олингани сариқ карточка билан боғлиқми? Ҳа, огоҳлантириш билан ҳам боғлиқ, аммо у биринчи бўлимдан кейин кичик жароҳат билан ҳаракат қилаётганди. Олдинда муҳим ўйинлар ҳам бор.

Чоракфиналда қайсидир рақибни кутаманми? Йўқ, қуръа бизга кимни туширса ўша жамоага қарши майдонга тушамиз. Кимнидир ёки қайсидир жамоани кутмайман. 

- «Хоразм»га қарши ўйин? Ҳа, навбатдаги турда «Хоразм» билан баҳс кутиб турибди, рақибни ҳурмат қиламиз. Энди ушбу ўйинга тайёргарликни бошлаймиз, - деди Вадим Карленович.