ПСЖ "Реал"нинг франциялик юлдузини сотиб олмоқчи

Франциянинг ПСЖ клуби бош мураббийи Луис Энрике "Реал" ярим ҳимоячиси Эдуарду Камавингни ўз сафига қўшиб олмоқчи. Бу ҳақда Marca нашри хабар бермоқда.

Манбага кўра, испаниялик мутахассиснинг фикрича, француз ПСЖ ярим ҳимоясини кучайтиради ва жамоага барқарорроқ ўйнаш имконини беради. Шу билан бирга, Мадриднинг "Реал" клуби Камавинганинг жароҳатларидан хавотирда экани айтилмоқда. Ўтган мавсумда футболчида тўртта жароҳат бўлган, умумий ҳисобда футболчи тикланиш учун 159 кун сарфлаган.

Эслатиб ўтамиз, Камавинга Мадрид клуби сафида 2021 йилдан буён тўп суриб келмоқда. Футболчининг "Реал" билан амалдаги келишуви 2029 йилнинг июнь ойи охиригача мўлжалланган. Ўтган мавсумда франциялик ярим ҳимоячи барча мусобақаларда 35 та ўйинда майдонга тушиб, 2 та гол ва 2 та ассистни ўз ҳисобига ёздириб қўйди.