Ўзбекистон ММА ассоциацияси IMMAF эътирофига сазовор бўлди!

Айни вақтда Грузиянинг Тбилиси шаҳрида ҳаваскор ММА  (IMMAF) бўйича жаҳон чемпионати давом этмоқда. 63 та давлатдан ташриф буюрган спортчилар ғолиблик учун баҳс юритишяпти.

Албатта ушбу дунё биринчилигида ўзбекистонлик спортчилар ҳам муваффақиятли иштирок этаяпти. Шубҳасиз, мазкур спорт турига расман руҳсат берилганига ва Ўзбекистон ММА ассоциацияси ташкил этилганига кўп бўлмади. Бироқ, қисқа вақт мобайнида улкан ютуқлар қўлга киритилди. Жумладан, ўтган йили Тошкентда ўтказилган жаҳон чемпионатида вакилларимиз ажойиб иштирок этиб, умумжамоа ҳисобида 1-ўринни қўлга киритишди.

18-20 ёш ва катталар ўртасидаги жаҳон чемпионатида 72 та мамлакатдан 843 нафар спортчи иштирок этди ва ўйналган 80 та медаллар жамғармасидан 30 тасини ўзбекистонлик спортчилар қўлга киритган эди. 5 йил ичида жаҳоннинг энг кучли терма жамоасига айланишни тарихий натижа десак, муболаға бўлмайди. Албатта, бунинг замирида улкан меҳнат ётибди.

Шунингдек, ҳукуматимизнинг спортга бераётган эътибори билан биргаликда ассоциация мутасаддиларининг жонбозлиги, мураббийларимизнинг катта меҳнати ётибди десак тўғри бўлади. Албатта, ушбу самарали фаолият беэътибор қолдирилмади ва куни кеча Ўзбекистон ММА ассоциацияси "Йилнинг энг яхши ассоциацияси" номинациясини қўлга киритди. Шубҳасиз, ҳали қилинадиган ишлар кўп. Лекин аста-секин янгидан-янги марралар забт этилишига ишонамиз!