Осиё чемпионати. 10 нафар боксчимиз финалга йўл олди!

Хабарингиз бор, 30 июлдан 12 августга қадар Таиланднинг Бангкок шаҳри 22 ёшгача бўлган боксчилар ва ёшлар ўртасида Осиё чемпионатига мезбонлик қилади.

Кун давомида У-19 терма жамоамиздан 12 нафар боксчи финал учун ўз баҳсларини ўтказди.

Бугунги биринчи ярим финал баҳсида, -48 кг вазнда рингга кўтарилган Мафтуна Мусурмонова Вьетнам вакиласи Тҳао Тҳан Лусни қийинчиликсиз таслим этди - 5:0;

Севара Маматова -60 кг вазнда бўлиб ўтган ярим финалда, қозоғистонлик Алина Кудаигеновага ҳеч қандай имкон қолдирмади. Севара жанг давомида рақибасини нокдаун ҳолатига ҳам туширди - 5:0;

Навбатдаги ярим финалда, Райҳона Қурбонбоева -70 кг вазнда қирғизистонлик Зарина Асановани иккинчи раундда техник нокаутга учратди;

-75 кг да Мафтуна Янгиева хитойлик Тонгтонг Гуга ҳакамларнинг қарорларига кўра 2:3 ҳисобида мағлуб бўлиб, бронза медали билан мусобақани якунлади;

-80 кг вазнда бўлиб ўтган баҳсда, Рухшона Парпиева қозоғистонлик Куралай Егинбайкизидан 0:5 ҳисобида енгилиб, чемпионатни учинчи ўринда тугатди;

-60 кг вазнда ўтказилган ярим финалда, Абдураҳмон Маҳмуджонов қозоғистонлик Тортубек Адилетга 2:3 ҳисобида имкониятни бой бериб қўйди;

Жаҳонгир Зайниддинов -65 кг вазнда бўлиб ўтган ярим финалда, хитойлик Юҳенг Лини қийинчиликсиз мағлуб этди - 5:0;

Абдулазиз Жўрақулов ҳам финалга йўл олди. Боксчимиз бу йўлда эронлик Салеҳ Роозбаҳанини 5:0 ҳисобида таслим қилди;

Муҳаммаджон Яқупбоев  -75 кг вазнда қирғизистонлик Усман Капаровдан 5:0 ҳисобида устун келди;

Норбек Абдуллаев ўтиш баҳсида, -80 кг вазнда Жанубий Корея вакили Ҳеон-Сеунг Жеонгни 5:0 ҳисобида мағлубиятга учратди;

-85 кг вазнда бўлиб ўтган ярим финалда, Самир Собиров яна бир Жанубий Корея вакили Дамҳеон Паркга ҳеч қандай имкон қолдирмади - 5:0;

+90 кг да Ислам Салиҳов эронлик Аббас Гаршасби устидан очколар эвазига зафар қучди.

Эслатиб ўтамиз, +80 кг вазндаги Собирахон Шахобиддинова қуръага кўра, тўғридан-тўғри финал йўлланмасини қўлга киритган. Бу ҳақда Ўзбекистон бокс федерацияси хабар бермоқда.