Нима бўлса ҳам, “Барса”га қайтмайман!

Франциялик маҳоратли футболчи Клеман Лангли “Нанси” ва “Севилья”даги фаолиятидан кейин 2018 йили “Барселона”га кўчиб ўтган эди.

Каталонияликлар унинг трансфери учун андалусияликларга қарийб 36 миллион евро тўлаган. Бироқ бу жамоани бошқарган бирорта бош мураббий Ланглега таркибдан муқим жой бермади.

Марказий ҳимоячи маълум муддат “Тоттенхэм” ва “Астон Вилла”да ижарада ўйнади. Ўтган ёз “Барса” 29 ёшли футболчини Мадриднинг “Атлетико” клубига ижарага жўнатди.

Диего Симеоне қўл остида Клеман Лангле “Атлетико”нинг муҳим ўйинчиларидан бирига айланди. Футболчининг агентлари “Барселона” клуби раҳбариятига мурожаат қилиб, мижозлари ижара муддати тугайдиган сана – 30 июндан кейин Каталонияга қайтмоқчи эмаслигини маълум қилди.

Лангле кейинги фаолиятини ҳам Мадрид клубида давом эттиришни истаяпти. У томонлар унинг трансфери бўйича келишиб олишига умид қилмоқда.