"Навбаҳор" бош мураббийи: "Ютса жамоа ютади, ютқазса мураббий. Ҳозирча тажрибам камроқ"

Суперлиганинг 25-туридан ўрин олган “Навбаҳор” – “Бунёдкор” (0:2) учрашувидан кейинги матбуот анжуманининг иккинчи қисмида мезбонлар бош мураббийи Шерзод Жўраев иштирок этиб, ОАВ ходимларининг саволларига жавоб берди. Бу хусусида клуб матбуот хизмати маълум қилди. 

“Лочинлар” устози одатдагидек, ўз сўзини ўйин ҳақидаги фикрлари билан бошлади.

- Ассалому алайкум! Учрашувни барчанглар кўрдинглар, тўғриси, баҳснинг бундай кечишини кутмагандим. Бугунги мағлубият учун айбни ўз зиммамга оламан. Чунки жамоанинг тайёргарлигига мен масъулман. Аслида шогирдларим ютқазишни хоҳлашмади ва охиригача ўйинда бурилиш ясашга интилишди. Лекин учрашувнинг 1-бўлимидаги хатолар якунда меҳмонларга ғалаба келтирди.

- Жамоани бошқаришда қийинчиликлар бўлмаяптими? Футболчилар кўрсатмаларингизни бажаришяптими?

- Бу Суперлигадаги эндигина учинчи ўйиним. Менда ҳали тажриба йўқ. Лекин йигитлар кўрсатмаларимни амалга оширишяпти. Лекин бу футбол. Футболда эса ҳамма нарса юз бериши мумкин. Ўйинчилар майдонга тушишганидан сўнг, Наманган аҳли ва “Навбаҳор” учун майдонда барча имкониятларини ишга солишлари лозим.

- Бугунги беллашувда икки хил бўлим гувоҳи бўлдик. “Навбаҳор” жамоаси аъзолари 2-бўлимда бошқача ўйин намойиш этган ҳолда, учрашувда бурилиш ясашга интилишди. Лекин ҳужумлар якунига етмади. Танаффусда шогирдларингизни қайдай руҳлантирдингиз? Умуман олганда, бугунги таркибдаги футболчиларнинг ҳаракатлари ҳамда ўйиндан қониқдингизми?

- Таъкидлаганимдек, Суперлигадаги мураббийлик борасида менда тажриба камроқ. Вақти-соати билан тажрибага эга бўламиз, албатта. Йигитларга “Навбаҳор” мухлисларини доимо хурсанд қилиш кераклиги, чунки улар бундан кўпроғига лойиқ эканликларини уқтирдим. Сўнгги мавсумларда жамоамизнинг чемпион бўлишига бир қадам қолди, икки марта Ўзбекистон кубоги финалига қадар етиб борди. Ушбу сўзларим билан эртага чемпионликни олиб бераман, демоқчи эмасман. Шунчаки, “Навбаҳор” мухлислари ижобий натижаларга лойиқ эканликларини таъкидламоқчиман, холос.
Таркиб борасида тўхталадиган бўлсам, машғулотларда қайси футболчилар яхши иштирок этишса, ўйинга тайёр бўлишса, ўша ўйинчиларни майдонга туширдим. Иккинчи бўлимда жамоа ўйинини кучайтириш учун Муҳаммадали Ғиёсов, Шоҳмалик Комиловларни захирадан майдонга тушириш режамда аввалдан бор эди.

- Урилмаган пенальти ўйинга қанчалик таъсир ўтказди?

- Балки, ўша 11 метрли жарима зарбаси урилганида, иккинчи бўлимда бошқача ўйин томоша қилишимиз, учрашув натижаси ҳам ўзгача бўлиши мумкин эди. Бироқ бу билан баҳона изламоқчи эмасман. Айтилганидек, ютса, жамоа ютади, ютқазса, мураббий. Ҳозирча тажрибам камроқ.

- “Навбаҳор”нинг У-21 ёшлар жамоасидан ҳам асосий таркибга футболчилар жалб этиладими?

- Шундай режамиз бор. Албатта, ёшлар жамоамиздаги 3-4 нафар футболчини асосий таркибга жалб этиш режамизда бор. Буни клуб раҳбарияти билан келишган ҳолда, амалга оширамиз.

- Жамоада штатли пенальтичи борми ёки қайси футболчида ишонч юқори бўлса, 11 метрли жарима зарбасини амалга оширадими? Боиси, пенальтиларни турли футболчилар амалга оширишмоқда. Олдинги беллашувда Аббосжон Ғуломов пенальтини амалга оширган бўлса, бугунги баҳсда Русланбек Жиянов 11 метрли жарима зарбасини тепди. Бу борада нима дея оласиз?

- Ҳар бир ўйиндан олдин стандарт вазиятлар ва пенальтиларни қайси футболчилар амалга оширишини аниқлаб бераман. Бизда штатли пенальтичилар кўп. Булар: Азимжон Аҳмедов, Аббосжон Ғуломов, Русланбек Жиянов ва Забиҳилло Ўринбоевлар. Улардан қайси бирида ишонч кучли бўлса, пенальтини ўша футболчи амалга оширади. Бугунги баҳсга Азимжон Аҳмедов, Аббосжон Ғуломов ҳамда Русланбек Жияновларни пенальтичи сифатида танлагандим.

- Забиҳилло Ўринбоев аввалги 2 та беллашувда майдонга тушмаганди. Лекин бугунги баҳсда асосий таркибдан жой олди ва унга кўпроқ имконият берлингиз. Ушбу ҳолатни қандай изоҳлайсиз?

- Забиҳилло Ўринбоевдаги хоҳишни кўриб, уни асосий таркибда майдонга туширдим. У машғулотларда астойдил шуғулланди. Бугунги ўйинни 2 нафар ҳужумчи билан бошлашга қарор қилдим. Шунинг учун Ўринбоев бошланғич таркибдан ўрин олди. Тўғри, бу баҳона бўлиши мумкин. Эмоцияга берилувчан бўлганлигим боис, ҳалигача бугунги учрашув ҳолатидан чиқиб кетолганим йўқ. Анчагача ўзимга келолмасам ҳам керак. Йигитлар кўрсатмаларни керак бўлса, минг фоизга бажаришлари шарт. Бундай тезлик билан футбол ўйнаб бўлмайди. Миллионлар ўйинида тезроқ фикрлаш, тўпни тезроқ жамоадошига етказиб бериш лозим. Камчиликлар устида ишлаб, уни бартараф этишга ҳаракат қиламиз. Барча мураббийларда мағлубиятли ўйинлар бўлиб туради. Кейинги баҳсларда мухлисларни хурсанд қилишга интиламиз.

- Бугунги ўйинда Бенжамин Тейди ва Жулио Цезарлар нима учун майдонга тушишмади?

- Тейдининг машғулотда оёғи синиб қолди, у энди икки ҳафтача майдонга туша олмайди. Цезарь даражасидаги футболчилар эса ўзимизда ҳам бор. Шунинг учун маҳаллий, ёш ўйинчиларга имконият беришга қарор қилдим. Улар ҳам секин-аста тажрибаларини ошириб боришлари лозим.Наманганда иқтидорли футболчилар кўп. Уларга ҳам имконият бериш лозим.

- “Навбаҳор”га бош мураббий сифатида тайинланаётганингизда клуб раҳбарияти билан суҳбатлашгансиз, албатта. Олдинда жамоанинг яна 5 та учрашуви бор. Сизга қандайдир вазифа қўйилганми, шунингдек, келаси мавсумга ҳам қандайдир режалар борми?

- Айтганимдек, бу менинг Суперлигадаги учинчи ўйиним ва ҳали менда тажриба кам. Ҳозир нимадир десам, бу баҳонага кириб қолади. Бу борада ҳеч нарса дея олмайман. Мендан аввалги мураббий Сергей Лушан ҳам имконияти даражасида фаолият олиб борди, ҳаракат қилди. Йигитларга тезкорликни кучайтириш лозимлиги, йўқса, қийин бўлишини таъкидладим.
Менга жорий мавсумни якунлаб қўйиш вазифасини қўйишди. Наманганлик бўлганим, “Навбаҳор” менга қадрдон бўлганлиги боис, таваккал қилган ҳолда жамоани қабул қилдим. Бундай ҳолатда четда туролмасдим. Буёғи, барчаси Аллоҳдан. Олдиндан башорат қила олмайман.

– Кейинги баҳсда “Навбаҳор” “Қўқон-1912” жамоаси меҳмони бўлади. Ўша баҳсда ёш футболчиларга ҳам имконият берасизми?

- Айтганимдек, Наманганда иқтидорли ўйинчилар кўп. Балки, Асадбек Жўрабоев ва Наврўзбек Иминжоновлар Қўқондаги баҳсда асосий таркибдан ўрин олишар. Буни клуб раҳбарияти билан маслаҳатлашган ҳолда ҳал этамиз.