Месси қайтадиган сана аниқ бўлди

“Интер Майами” ва Аргентина терма жамоаси сардори Лионель Месси жароҳатини даволатишни давом эттирмоқда.

Журналист Эрнан Клаус саккиз карра “Олтин тўп” соҳиби қачон майдонга қайтишига ойдинлик киритди. У берган маълумотларга қараганда, Месси ҳозир индивидуал машғулотларни давом эттирмоқда ва тез орада умумий гуруҳга қўшилади.

Кўпчилик Мессининг 1 сентябрь куни “Чикаго Файр”га  қарши баҳсда иштирок этишини кутяпти. Бироқ клуб шифокорлари Леони майдонга қайтаришга шошилмасдан, уни 14 сентябрда “Филадельфия Юнион” билан бўладиган беллашувгача оёққа қўймоқчи.

Эслатиб ўтамиз, Месси 15 июль куни Америка Кубоги финалида Колумбияга қарши ўтказилган учрашувнинг 64-дақиқасида оёғидан жароҳат олган эди.