Машарипов жамоаси Кожо учун "Динамо"га қанча тўлайди?

Самарқанднинг "Динамо" ҳужумчиси Жоэль Кожо Эроннинг "Истиқлол" клуби футболчисига айланди. Қирғизистонлик футболчи "Transfermarkt"да форс клуби аъзоси сифатида кўрсатилмоқда.

Ушбу трансфер учун "кўклар" Самарқанд клубига 300 минг доллар тўлайди. Бир неча кун аввал футболчининг Теҳронда тиббий кўрикдан муваффақиятли ўтгани ҳақида хабар берган эдик. Тез орада расмий хабар эълон қилинади.

Маълумот учун, Кожо 2024 йилги мавсум Суперлигада 24 та ўйинда қатнашиб, 8 та гол урди ва 3 та голли узатмани амалга оширди.