Levandovskini mashhur klubga o‘tishga ko‘ndirishyapti

Robert Levandovskining kelajagi yana xalqaro maydonda hal qiluvchi ahamiyat kasb etmoqda, chunki uning “Barselona” bilan 2026 yil iyun oyida tugaydigan shartnomasining so‘nggi muddati yaqinlashyapti.

Polshalik hujumchi atrofidagi harakatlar hafta sayin kuchaymoqda. Turli ligalar klublari dastlabki aloqalarni o‘rnatyapti va  uning erkin agent sifatida qo‘lga kiritish  imkoniyatini  ko‘rib chiqmoqda.

Robert o‘z kelajagi borasida xotirjam va hali aniq yo‘lni tanlamaganini takrorlamoqda. U bosimni his qilmayotganini va o‘zi lozim topganda qaror qabul qilishini ta’kidladi. “Barselona”da uning shartnomasi tugayotganini bilishadi va uni uzaytirish bo‘yicha harakat yo‘q, bu esa uni strategik jihatdan foydali imkoniyat, deb bilgan klublarning qiziqishini oshirmoqda.

Ana shunday klublardan biri “Fenerbahche”dir. Turk klubi yanvar oyida o‘z hujumchisi Yussuf En-Nesirini sotishni rejalashtirmoqda va polshalik hujumchini hujumdagi asosiy ustuvor vazifa sifatida qoldirmoqda. Istanbuldagi manbalarning ta’kidlashicha, klubning sport direktori Devin O‘zek uni klubga qo‘shilishga ko‘ndirishga urinmoqda. Agar ijobiy javob bo‘lsa, “Fenerbahche” darhol “Barselona” bilan muzokaralarni boshlaydi.