Ла Лига раҳбари ҳакамликдан норози бўлган "Реал"ни танқид қилди

Ла Лига президенти Хавьер Тебас Мадриднинг "Реал" клуби "Реал Соседад"га қарши ўйиннинг 32-дақиқасида "қаймоқранглилар" ҳимоячиси Дин Хаусен четлатилгач, испан футболидаги ҳакамлик устидан ФИФАга шикоят қилиш истаги борлиги ҳақида гапирди. Бундан ташқари, функционер ҳакамнинг қарорига ҳам муносабат билдирди.

"Шикоят бутун Испания ҳакамлигини қамраб олишини айтишган экан, демак, у барча клубларни қамраб олади. Агар у фақат "Реал" ва "Барселона" ҳақида бўлса, бу нохолис бўлади. Бизда Opta барча клублардан четлатишлар, пенальтилар билан нима бўлгани ҳақида маълумот бор. "Реал"нинг четлатилгани ҳақида ҳеч қандай ҳисобот кўрмадим. Қизиқ... Бу тўлиқ ҳисобот бўлсин ва ҳар ким ундан ўз хулосаларини чиқарсин. У фақат рақобатга зарар етказишга қаратилган бўлади.

Мен ўз фикримни билдирмоқчи эмасман (Хаусенни четлатиш ҳақида) ва бунга аралашишнинг ҳожати йўқ. Ишончим комилки, ҳакамлар буни тушунтиришади. Менинг ўз мухлислик фикрим бор. Биз ФВС (Фоотбалл Video Support - футбол ўйинларини видео қўллаб-қувватлаш тизими) модели йўналишида ҳаракат қилишимиз керак", - дея Тебаснинг сўзларини келтиради AS.

Эслатиб ўтамиз, ФВС тизими туфайли мураббийлар, агар хатога йўл қўйилган деб ҳисобласа, ҳар бир ўйинда видео такрорларни кўриш учун икки мартагача сўров юборишлари мумкин. Агар мураббий хатога ишора қилса, ҳакам майдон четига чиқиб, эпизоднинг такрорланишини кўради. ФВС VAR тизимига нисбатан арзонроқ муқобил сифатида кўрилади.