Клопп футбол тарихидаги энг зўр мураббий номини айтди

“Ливерпуль” ва “Боруссия Дортмунд” клубларининг собиқ бош мураббийи Юрген Клопп футбол тарихидаги энг кучли устоз кимлигини айтди.

- Менда сэр Алекс Фергюсон билан алоқадор бир неча ажойиб ҳолатлар бўлган. У билан суҳбатлашишнинг ўзи ҳам жуда катта шараф. Мураббий учун амалга ошириши мумкин бўлган энг зўр нарса бу Фергюсон билан ўтириб, уни тинглаш. Уни тушуниш учун менга ўн дақиқа кифоя қилди.

Фергюсон футбол оламидаги энг буюк мураббий. Уни қаттиқ ҳурмат қиламан. Унинг мураббий сифатида қўл урган ишларини қайтариш осон эмас, - деди Юрген Клопп.

Сэр Алекс Фергюсон футбол тарихидаги энг муваффақиятли мураббийлардан. Бу мутахассис  “Манчестер Юнайтед”ни 1986-2013 йиллар давомида бошқарган. Унинг қўл остида “Юнайтед” футболчилари 13 бор Англия чемпионати ғолиби, беш марта Англия кубоги соҳиби ва икки марта Европа Чемпионлар лигаси чемпиони бўлган.