Жаҳон чемпионатига яна иккита терма жамоа қўшилди (Мундиалга чиққан барча терма жамоалар рўйхати)

2026 йилнинг ёзида футбол бўйича ўтказиладиган жаҳон чемпионатига бирданига уч мамлакат – АҚШ, Канада ва Мексика мезбонлик қилади. Айни пайтда айрим минтақаларда йўлланмалар учун кураш ҳал қилувчи паллага кирган.

Европа минтақаси саралаш турнирининг навбатдаги учрашувларидан кейин жаҳон чемпионатида иштирок этиш ҳуқуқини қўлга киритган яна иккита терма жамоа номи маълум бўлди. Булар Германия ва Нидерландия.

Германия терма жамоаси ўз майдонида ўтказилган учрашувда Словакия футболчилари дарвозасига жавобсиз олтита тўп киритди ва “А” гуруҳи пешқадами сифатида жаҳон чемпионатига йўлланма эга бўлди.

Нидерландияликлар эса, Литва терма жамоасини 4:0 ҳисобида енгиб, “G” гуруҳида биринчи ўринни ўзиники қилди.

 2026 йилги жаҳон чемпионатида иштирок этадиган терма жамоаларнинг ҳозирги рўйхати қуйидагича кўриниш олди:

АҚШ, Канада, Мексика, Япония, Янги Зеландия, Эрон, Аргентина, Ўзбекистон, Жанубий Корея, Иордания, Австралия, Бразилия, Эквадор, Уругвай, Колумбия, Парагвай, Марокаш, Тунис, Миср, Жазоир, Гана, Кабо-Верде, ЖАР, Қатар, Саудия Арабистони, Англия, Сенегал, Кот-д'Ивуар, Франция, Хорватия, Норвегия, Португалия, Германия ва Нидерландия.

Мундиалнинг 48 та ўрнидан 34 таси тўлди. Терма жамоалар яна 14 та йўлланма учун курашни давом эттиради.