Ҳусановнинг бирданига икки жамоадоши ашаддий рақибга ўтиб кетмоқчи

“Манчестер Сити”нинг икки ҳужумкор футболчиси Жек Грилиш ва Фил Фоден келаси мавсум олдидан жамоани тарк этиши мумкин.

TALKSPORT нашрининг ёзишича, бу ўйинчиларда фаолиятини “шаҳарликлар”нинг ашаддий рақобатчиларидан ҳисобланган “Арсенал”да давом эттириш имконияти пайдо бўлди.

Манбага кўра, ўз даврида Хосеп Гвардиоланинг ёрдамичиси бўлиб ишлаган ва айни пайтда “Арсенал”ни бошқараётган Микель Артета Грилиш ва Фоденни ўз жамоасига олиб ўтмоқчи.

Гвардиоланинг ўзи Грилишга янги жамоа топишни айтган ва шу боис англиялик ўйинчини АҚШ мезбонлик қилаётган клублар ўртасидаги жаҳон чемпионатига олиб кетмади. Жекка “канонирлар”дан ташқари “Тоттенхэм”, “Эвертон” ва собиқ жамоаси “Астон Вилла” ҳам жиддий қизиқиш билдиряпти.

Фил Фоден ўйинида ўтган мавсум кескин пасайиш кузатилди. Экспертлар унга фаолиятини тиклаб олиш учун муҳитни ўзгартиришни тавсия қилишмоқда. Бундан ташқари, “шаҳарликлар” Фоден ўйнайдиган позицияларга “Лион” юлдузи Райан Шеркини олиб келди. Бу омил ҳам Фил Фоденнинг бошқа жамоага ўтишига йўл очиши мумкинлиги айтилмоқда.