Файзуллаев ўзини "қийнаган" мураббийдан қутилди!

Москванинг ЦСКА клуби бош мураббийи Марко Николич “армиячилар” сафини тарк этадиган бўлди. Сербиялик мураббий ишни Грециянинг АЕК клубида давом эттиради.

Грециянинг Mozzart Sport нашрининг маълум қилишича, Ҳар икки клуб ва мураббийнинг ўзи бу ўзгариш борасидаги ишларни тамомлаган ва Николичнинг янги жамоага ўтган тез орада расман эълон қилинади.

АЕК клуби 46 ёшли мутахассис билан икки йиллик шартнома имзолайди. Грецияликлар Николичнинг шартномасини ЦСКАдан сотиб олиш учун москваликларга 600 минг евро тўлайди. Аввалроқ, агар АЕК бадал пулини тўламаса, сербиялик мутахассиснинг ўзи ўз шартномасини сотиб олишга тайёрлиги ҳақида маълум қилинган эди.

ЦСКА мураббийлар штабини тўлиқ янгилашига тўғри келади. Чунки Марко Николич янги иш жойига ўз ёрдамичилариРадое Смилянич, Александар Рогич ва жисмоний тайёргарлик бўйича мутахассис Горан Басарични олиб кетади.

Таъкидлаш жоизки, ўтган ёзда “армиячилар”ни қабул қилиб олган мураббий бир йил ичида натижа кўрсатди. Унинг қўл остида ЦСКА Россия Премьер-лигасида бронза медалга эга чиқди ва мамлакат кубоги ғолиби бўлди.

Бу натижалар Николич қишки танаффус пайтида жамоанинг ўйин схемасини ўзгартириб, ромб услубида ўйнашга ўтганидан кейин қўлга киритилди. Таъкидлаш лозимки, сербиялик мураббий киритган янги усул Аббосбек Файзуллаевнинг танқидларга учрашига сабаб бўлди.

Мавсумнинг биринчи ярмида ёрқин ўйин кўрсатган ва самарали ҳаракатларни амалга ошириб келган легионеримиз майдондаги жойи ўзгарганидан кейин ўзини кўрсатиши қийинлашиб қолди. Николич Аббосга майдонни марказидан жой олиб, ҳам ҳужум, ҳам ҳимояда фаол ўйнаш вазифасини қўйди.

Янги талабларга мослашиш Файзуллаевга осон бўлганий йўқ. Легионеримиз мутахассислар ва мухлислар томонидан танқидга учраган вазиятлар бўлди. Николич Аббоснинг ўйинидаги пасайишлар вақтинча эканини таъкидлади.

- Аббосбек ўсишда давом этмоқда. Мен унинг жуда катта салоҳиятга эга эканини кўриб турибман. Аббосни танқид қилаётганларнинг фикрига умуман қўшилмайман. Файзуллаев жуда катта ҳажмдаги ишларни уддалаяпти, бироқ ҳужумларни самарали якунлашни яхшилаши талаб этилади. Бунга эришган тақдирда бир мавсумда ўнта гол уриб, ўнта ассист қайд этадиган даражага чиқади ва уни ҳеч ким ушлаб қола олмайди. Файзуллаев янги ўйин схемасига тўлиқ мослашиб бўлди, - деди Марко Николич.

Ўзбекистон миллий терма жамоаси етакчиларидан ҳисобланган Аббосбек Файзуллаев ҳам ўйини ва самарадорлигинидаги пасайишлар майдондаги позициясини ўзгартиргани натижаси эканини ва асосий таркибга кириш учун рақобатдан чўчимаслиги, курашишга тайёр эканини бир неча бор айтган эди.

Хусусан, интервьюларидан бирида 21 ёшли ҳужумкор футболчимиз “Мен меҳнат қилавераман, лекин қарорни бош мураббий қабул қилади. Мен Николич учун гапира олмайман. Ўзим ўзимни таркибга киритолмайман. Рақобат ҳар доим бўлган ва бундан кейин ҳам бўлади. Мен ЦСКАга келган давримда ҳам рақобат ҳозиргидан кам эмас эди. Ҳамма нарсага тайёрман. Миралем Пьянич билан ҳам, янги келган ўйинчилар билан рақобатлашишга ҳозирман”, деган эди.

Аббосбек Файзуллаев якунланган мавсумда жами 39 та учрашувда иштирок этиб, рақиблар дарвозасини уч маротаба ишғол қилди ва жамоадошларига саккизта голли пас узатди.

Ҳамюртимизнинг ўзи ҳам якунланган мавсумда клубидаги шахсий кўрсаткичларидан қониққани йўқ.

- Бу мавсумни шахсан ўзим учун ўтган йилгига солиштирганда ёмон баҳолайман. Бултур самардорлик бўйича бешта гол ва 14 та ассист қайд этгандим. Бу гал бу кўрсаткич 3+8 кўринишида бўлди.

Мавсумнинг иккинчи қисмида майдондаги позициям ўзгарди ва пасайиш биринчи навбатда шу билан боғлиқ. Ўзгариш ўз таъсирини кўрсатди. Мавсум жуда яхши бошланганди, кейин ўрним ўзгарди. Натижада статистик кўрсаткичлар аввалгидек бўлмади, лекин мен янги позицияга кўникиб олишга ҳаракат қилдим, - деди Аббосбек Файзуллаев.

Файзуллаев ёш бўлишига қарамай, фаолияти давомида бир неча нуфузли совринларни қўлга киритган. Хусусан, “Пахтакор”да ўйнаб юрган кезлари уч карра мамлакат чемпиони, Ўзбекистон Суперкубоги соҳиби бўлган.

Ўзбекистон U-20 терма жамоаси сафида Осиё кубогида зафар қучган.

Аббосбек Файзуллаев шахсий совринлари сонини ҳам кўпайтириб бормоқда. У ҳозирга қадар “Осиё кубоги U-20” мусобақасининг энг яхши футболчиси, 2023 ва 2024 йилларда Ўзбекистоннинг энг яхши футболчиси, 2023-2024 йилги мавсумда Россия Премьер-лигаси кашфиёти, 2023 йилда Осиёнинг энг яхши ёш ўйинчиси, деб топилган.

Ҳусанов бошланиши, ўзбек футболчилари Европани забт этади!

“Манчестер Сити” жаҳон чемпионатига олиб кетмайдиган футболчи номини эълон қилди

Ўзбекистондек мундиалга чиқиш учун футболдан бегона одамларни йўқотиш керак!

Ҳусановнинг “Манчестер Сити”даги келажаги муҳим қарорга боғлиқ?