Arablar Ronaldu "Real"ga qarshi o‘ynashini istashmoqda

Krishtianu Ronaldu hozircha "An-Nasr" klubidan ketish borasida qaror qabul qilgani yo‘q.

Avvalroq hujumchi ijtimoiy tarmoqlarda: "Bu bob yakunlandi. Tarix esa? Hali yozilmoqda", — deb klubini o‘zgartirishi mumkinligiga ishora qilgandi.

Jurnalist Ben Jeykobning ma’lumotiga ko‘ra, Ronaldu yaqinda yozgan xabariga qaramay, u bilan "An-Nasr" o‘rtasida yangi shartnoma bo‘yicha muzokaralar davom etmoqda.

Ba’zi Saudiya Arabistonidagi nufuzli shaxslar portugaliyalik futbolchining "Al-Hilol" bilan qisqa muddatli shartnoma imzolashini istamoqda, bu orqali u klublar o‘rtasidagi jahon chempionatida "Real"ga qarshi maydonga tusha oladi. Hozircha Ronalduning "Al-Hilol"ga o‘tishni xohlashi noma’lum.

Shuningdek, FIFA prezidenti Janni Infantino Saudiya Arabistonidan tashqari klublarni ham Krishtianu Ronalduni musobaqaga jalb etishga da’vat qilgan.

Ronaldu yaqin ikki hafta ichida yakuniy qarorini qabul qilishi kutilmoqda.