Галиулиннинг жамоаси еврокубокларда ўйнаш ниятида, аммо...

Хабарингиз бор ҳамюртимиз Вагиз Галиулин тўп сурадиган Санкт-Петербургнинг “Тосно” клуби 9 май куни Россия кубоги финалида “Авангард”га қарши майдонга тушади. Эътиборлиси, агар питерликлар ушбу ўйинда ғалаба қозонишса, УЕФА Европа лигасида иштирок этиш йўлланмасини қўлга киритишади.

Бироқ, жамоа ҳозирча еврокубоклар иштирокчиларини лицензиялаш бўлимига ариза топширишгани йўқ. Россия футбол иттифоқининг лицензиялаш бўлими бошлиги Евгения Летинанинг сўзларига кўра агар “Тосно” ариза топширмаса, у ҳолда ушбу еврокубок йўлланмаси чемпионатда 6-ўринни эгаллаган жамоага насиб этиши мумкин.

Ўз навбатида “Тосно” клуби бош директори Вячеслав Матюшенко жамоа Европа лигасидек нуфузли мусобақада иштирок этишдан бош тортмайди.

“Биз лицензиялашдан ўтиш учун керакли хужжатларни йиғяпмиз. Баъзиларини тайёрлаб бўлдик, баъзилари эса ҳозирча тайёр эмас. Биз ҳаракатдамиз”, - дейди Матюшенко.

Эслатиб ўтамиз, Вагиз Галиулин сайтимизга берган интервьюсида “Тосно”нинг асосий мақсади премьер-лигада қолиш эканлигини айтган эди.