Январда “Реал” ҳужумчиси кетади

“Реал”нинг бразилиялик ҳужумчиларидан бири –  19 ёшли Эндрик  қишки трансферлар ойнаси очилиши билан Мадрид шаҳрини тарк этиши кутилмоқда.

Defensa Central нашрининг маълум қилишича, бу футболчи катта истеъдод соҳиби бўлишига қарамай, ички рақобатнинг кучли экани ва жароҳат туфайли асосий таркибга кира олмаяпти.

Эндрикка ҳозирнинг ўзидан Ла Лиганинг “Валенсия” ҳамда “Сельта” сингари ўртамиёна жамоалар жиддий қизиқиш билдирмоқда. Улар футболчини январда ўз сафига қўшиб олишга тайёр.

Аслида Эндрик ёзда бошқа жамоага ўтиши кутилганди. Лекин бир неча марта жароҳат олган футболчининг режаси амалга ошмади.

Бразилиялик ҳужумчи “Реал”га 2024 йилнинг ёзида келган ва ўтган мавсумда барча турнирларда 37 та учрашув ўтказиб, еттита гол ва битта ассист муаллифи бўлди.

Transfermarkt портали томонидан 35 миллион еврога баҳоланаётган Эндрикнинг “Қироллик клуби” билан имзолаган шартномаси 2030 йилнинг ёзигача давом этиши кутиляпти.