Ян Зоммер: Футболчиларнинг саломатлиги биринчи ўринда туриши керак

Ҳозирда Миланнинг “Интер” клуби шарафини ҳимоя қилаётган швейцариялик дарвозабон Ян Зоммер мавсум тақвими йилдан-йилга тиғизлашиб бораётгани ҳақидаги мунозараларга қўшилди.

“Кўп ўйин? Ҳа, бу ҳақда кўп гапирилади. Мен футболчиларнинг саломатлиги биринчи ўринда туриши керак деб ҳисоблайман. Бир неча йил олдин мен бутун мавсумни бемалол ўтказишим мумкин эди. Ҳозир эса бир мавсумда 70 га яқин ўйин бор. Шунинг учун биз Чемпионлар лигаси ва клублар ўртасидаги жаҳон чемпионатининг ушбу экспериментал мавсуми қандай ўтишини кўришимиз керак ва ана шундан сўнг тўғри қарорлар қабул қилинади деган умиддаман”, - деди Зоммер pianetamilan.it нашрига берган интервьюсида.

Аввалроқ, «Манчестер Сити» ярим ҳимоячиси Родри тақвим ҳаддан ташқари тиғиз бўлиб кетгани учун футболчилар томонидан иш ташлаш эҳтимоли борлигини айтганди.