Хавьер Мендес: “Ислом Махачев янги вазн тоифасида ҳайратланарли даражада кучли кўринмоқда”

АКА залининг асосчиси ва машҳур мураббий Хавьер Мендес ўз шогирди Ислом Махачевнинг жисмоний формаси ва тайёргарлигидан ҳайратда қолганини айтди. 

“Лагерга бир ойча олдин келганимда Исломни кўриб ҳайратда қолдим. У ҳақиқатан ҳам ажойиб формада эди. Махачевнинг машғулотларини кузатар эканман, унинг қандай ўсаётганига гувоҳ бўлдим. У билан илк спаррингни ўтказганида эса бутунлай лол эдим. У янги вазнга ажойиб тарзда мослашибди”, — деди Мендес "ММА Junkie" You Tube каналига берган интервьюсида.

Маълумот учун, Ислом Махачев илгари енгил вазн (70 кг) тоифасининг чемпиони эди. Бироқ энди у 77 кг да ўзини синаб кўрмоқчи. Агар россиялик 16 ноябрь куни "UFC 322" турнирида Жек Делла Маддалена устидан ғалаба қозонса, ярим ўрта вазнда чемпионга айланади.