Хаби Алонсо: "Бу баҳс — ҳақиқий Европа классикаси!"

"Реал Мадрид" бош мураббийи Хаби Алонсо Чемпионлар лигаси 3-туридаги "Ювентус"га қарши баҳс олдидан ўз фикрларини билдирди.

"Бу баҳс — ҳақиқий Европа классикаси. Жамоалар кўп марта тўқнаш келган, мен ҳам айрим ўйинларда иштирок этганман. Биз ўйинга яхши тайёргарлик кўрдик ва Чемпионлар лигасида учинчи ғалабамизни қўлга киритишни истаймиз. Одамлар "Бернабеу"га катта ўйинларни кўриш учун келади, биз уларга ҳиссиёт уйғотадиган ўйин тақдим этишимиз керак", — деди Алонсо.

Суҳбат давомида мураббийдан "Ювентус" сифати ҳақида ҳам сўрашди:

"Биз туринликларга қарши ўйинга жиддий муносабатдамиз. Ҳар қандай италиялик жамоа хавфли бўлиши мумкин, ҳатто яхши формада бўлмаган тақдирда ҳам. Масалан, ўтган мавсум "Милан" қандай формада эканлигини эсламайман, лекин ўйин қандай ўтганини яхши эслайман. Тарихни унутмаслик керак. "Юве" — ўтмишда ҳам, ҳозир ҳам буюк жамоа. Улар таркибида ажойиб футболчилар бор, жумладан Йилдиз ҳам. У катта ютуқларга эришди. У "Бавария"да мен билан бир пайтда бўлган. Унинг ривожидан жуда хурсандман.

Тактик жиҳатдан "Ювентус" жуда кучли жамоа. Улар позицияларини тез-тез ўзгартиради, ротация қилади. Агар сиз позицион жиҳатдан етарлича кучга эга бўлмасангиз, улар сизни мувозанатдан чиқариши мумкин. Биз бу жиҳатда эҳтиёткор бўлишимиз, тўпни назорат қилишимиз, вертикал ўйин кўрсатишимиз ва ўйинни ўзимиз хоҳлаган тарзда олиб боришимиз керак", — деди испаниялик мутахассис.