WBА'нинг апрель ойи учун янгиланган рейтинги эълон қилинди. Бир қатор боксчиларимиз юқорилади

Бутунжаҳон бокс aссоциацияси (WBА) апрель ойи учун ўз рейтингини эълон қилди. Унга кўра, бир қатор ўзбекистонлик профессионал боксчиларнинг рейтингдаги ўринларида ўзгаришлар бўлди. 

Биринчи ўта енгил вазнда (-48,9 кг) Тошкентда ўтказилган бокс оқшомида Муҳсин Кизотани мағлуб этиб, WBА International камарини қўлга киритган Ҳасанбой Дўсматов рейтингга киритилди ва 4-поғонадан жой олди.

Биринчи ярим енгил вазнда (-55,3 кг) Муроджон Аҳмадалиев чемпион сифатида қайд этилган. Ахмадалиев ҳам ўз камарларини Рёсуке Ивасадан омадли ҳимоя қилган эди.

Супер енгил вазн тоифасида (-63,5 кг) WBА International камари соҳиби Шаҳрам Ғиёсов ҳам Аҳмадалиев билан бир кечада Патрисио Моренони мағлуб этган. Мазкур ойдаги рейтингда Ғиёсов 6-ўриндан 3 поғона юқорилаб, 3-ўринни эгаллади. Шоҳжаҳон Эргашев эса ўтган ойдаги каби 8-ўринни сақлаб қолди.

Супер ярим ўрта вазнда (-69,8 кг) Исроил Мадримов ўтган ойдаги каби 1-ўринни сақлаб қолди ва мазкур йўналишда чемпионлик камари учун мажбурий даъвогар бўлиб турибди. Мадримов Тошкентдаги бокс оқшомида Эммани Коломбони мағлуб этган.

Супер ўрта вазнда (-76,2 кг) WBА Continental Americas камари соҳиби Бектемир Мелиқўзиев ўтган ойдаги 15-ўриндан 7-ўринга кўтарилди. Мелиқўзиев ўзининг навбатдаги жангини 19 июнь куни Габриэль Росадога қарши ўтказади.

Яримоғир вазнда (-79,3 кг) Рустам Тўлаганов ўтган ойда 14-ўринда бораётган эди. Аммо Тўлаганов апрель ойи рейтингида кучли 15 ликни тарк этди.

Мазкур рейтингдан бошқа ўзбекистонлик боксчилар ўрин олмаган.