Винисиус нега учрашувдан кейин Ҳусановнинг олдига келди?
- 18-март, 05:26
- Zohir Toshxo’jayev
- 0
- Футбол
“Манчестер Сити” УЕФА Чемпионлар лигасининг 1/8 финали жавоб учрашувида ҳам “Реал”га бас кела олмади. Винисиус Жуниорнинг иккита голига Эрлинг Холанд бир бор жавоб қайтара олди холос.
“Этихад” аренада 2:1 ҳисобида зафар қучган мадридликлар мусобақанинг кейинги босқичига йўл олди.
Бу учрашувда футбол мухлислари яна Абдуқодир Ҳусанов ва Винисиус Жуниорнинг ўзаро тўқнашувига гувоҳ бўлди. Ўзаро рақобатнинг аксарият вазиятлари Абдуқодирнинг устунлигида якунлади. Бироқ бразилиялик юлдуз иккита гол уришга муваффақ бўлди. Тўлиқ ўйнаган Абдуқодир эса, биринчи бўлим охирида Винисиус Жуниорни жуда қаттиқ қарши олди ва қўполлиги учун сариқ карточка билан огоҳлантирилди.
Нуфузли манба – manchestereveningnews.co.uk портали эксперти Саймон Байковски учрашувдан кейин ижтимоий тармоқлардаги саҳифасида ушбу учрашув якунланганидан кейин гол муаллифлари Эрлинг Холанд ва Винисиус Жуниорнинг Абдуқодир Ҳусановга ўйин учун миннатдорлик билдирганига эътибор қаратди.
- “Манчестер Сити” Чемпионлар лигаси учрашувида “Реал”га ютқазган учрашувдан кейин Эрлинг Холанд ва Винисиус Жуниор Абдуқодир Ҳусановнинг ёнига келиб, ажойиб ўйнаганини эътироф этди, - деб ёзди Саймон Байковски.
Таниқли журналистнинг постига “Манчестер Сити”нинг бутун дунёга ёйилган мухлислари изоҳ ёза бошлади.
Ҳозиргача ёзилган комментларда Абдуқодир Ҳусановга қуйидагича муносабат билдирилган.
Modou Gueye:
“Шаҳарликлар”га раҳмат, ҳали ҳамма яхшиликлар олдинда!
Cassi Nova:
Энди Ҳусанов, Шерки ва Докунинг якшанба куни “Арсенал”га қарши қандай ўйнашини кўринг!
John Graham:
Ҳусанов Премьер-лигадаги энг тезкор ҳимоячилардан бири ва у ўйиндан ўйинга кучайиб бормоқда. Фантастик даражадаги трансфер.
Lynne Bowers:
Ҳусановни ажойиб ўйин билан табриклайман.
Tyrone David:
Зўр учрашув бўлди, курашувчан руҳда ўтди. Ҳусанов, Шерки ва Доку зўр ўйнади. “Арсенал” кутиб ол!
Pharm Aliyu Ibraheem:
Диашнинг эринчоқлиги Силванинг қизил карточкага олиб келди.
Odhiambo Benjamin:
Бизнинг жамоамизда кетадиган ҳимоячи бўлса, бу Ҳусанов эмаслигига аминман.
Palmer Jairos Sithole:
Мавсумни қутқариб қолиш учун келаётган якшанба куни “Арсенал”га қарши жуда кучли ўйин намойиш этишимиз керак бўлади.
Эслатиб ўтамиз, “Манчестер Сити” 22 март куни Англия лигаси кубоги финалида “Арсенал” билан куч синашади ва жорий мавсумдаги илк совринини қўлга киритиш учун курашади.