Вилоят ҳокими "Насаф" жамоаси аъзолари билан учрашди

Бугун Қашқадарё вилояти ҳокими, вилоят футбол ассоциацияси президенти Муротжон Азимов ва "Шўртан газ-кимё" мажмуаси бош директори Шуҳрат Асланов "Насаф" футбол клуби қароргоҳига келиб футболчи ва мураббийлар билан учрашди.

Муротжон Бердиалиевич жамоа Суперлигада карвонбошилик қилаётганини ва бу шижоатни мавсум охиригача ушлаб қолиш кераклигини, Қашқадарё халқи Суперлига чемпионлигини кутаётганини алоҳида таъкидлаб ўтди. Шунингдек, жамоада ташкилий масалар бўйича ҳеч қандай муаммо бўлмаслиги айтиб ўтилди.

"Насаф" президенти Шуҳрат Чориевич ҳам жамоага бўшашмасликни, футболчилар бу вазифани уддалай олишини ва клуб янги тарих ёзиш арафасида турганини эътироф этди.

Эслатиб ўтамиз, қаршиликлар ортда қолган 16 тур натижасига кўра 35 очко жамғариб, турнир жадвалида пешқадамлик қилмоқда.

"Аждарлар" 25 август куни Қаршида Андижоннинг "Андижон" жамоасини қабул қилади.