Вадим Абрамов: "Курашишда давом этамиз, нима бўлишини кузда кўрамиз"

Суперлиганинг 19-туридан ўрин олган «Динамо» - ОКМК (1:0) ўйинидан кейин дастлаб мезбонлар бош мураббийи Вадим Абрамов матбуот анжуманида қатнашиб, журналистлар саволларига жавоб қайтарди. Бу хусусида клуб матбуот хизмати маълум қилди.

- Аввало, ҳар ўйинда стадионимизни тўлдираётган самарқандлик мухлисларни бугун ниҳоят ғалаба билан хурсанд қила олганимиздан мамнунман. Уларнинг қўллаб-қувватлаши остида йигитлар мана шундай қийин ўйинларда куч олиб, охиригача курашишмоқда. ОКМК – асосий рақибларимиздан бири, яхши жамоа, уларни мағлуб этиш икки карра қувонарли. Тақвим зич, вақт тиғиз, шунга қарамай кейинги ўйинларгача тезроқ тикланиб олишимиз керак.

- ОКМК сўнгги дақиқалардаги камбэклари ва охиригача курашиши билан ажралиб туради. Рақибни тўхтатиш учун қайси омилларга эътибор бердингиз?

- Рақиб стандартларда кучли эканини билардик, шу боис захирадан туширилган ўйинчиларни ҳам иккинчи қаватдаги курашларда ютқазиб қўймасликни ўйлаб амалга оширдик. Шунга қарамай, рақиб жамоа босим ўтказа олди. Яна уч кун ўтиб бизни ўйин кутмоқда. Кучни тўғри тақсимлашимиз керак. Мана шундай ўйинлар орқали жамоа кучаяди ва ўзига ишончи ортади.

- Бугун таркибда жиддий ўзгаришлар кўрдик – Эдем Неманов Суперлигада илк бор асосий таркибда тушди, Ҳожимирзаевни ҳужум марказида кўрдик. Бу зич тақвим пайтида ротациями ёки ҳозирги вазиятда шундай ўзгаришларга мажбур бўлдингизми?

- Буни ротация ҳам дейиш мумкин. Аммо биз рақиб жамоани ўрганамиз ва уларнинг стандарт вазиятларда дарвоза олдида иккинчи қаватда ўйнашини билардик. Асосий дарвозабонимиз бўйи унча баланд эмас, шу боис бўйдор Немановга ишонч билдирдик. Ҳожимирзаевнинг ҳужум марказига қўйганим эса Улуғбек Ҳошимовнинг жароҳати билан боғлиқ. Бу вазиятдан шундай ўзгариш орқали чиқиб кетиш мумкин эди. 

- Ўтган йил вилоят ҳокимлиги жамоага қароргоҳ қуриб бериши ҳақида гапирган эдингиз. Бу борада янгиликлар бўлдими?

- Бунга вақт талаб этилади. Бу борада ўзгаришлар бор, вилоятимиз ҳокимидан миннатдормиз – жамоага эътибор қаратмоқда. Бу борада ишлар олиб бориляпти, умид қиламанки шу йилнинг ўзидаёқ жамоа ўз қароргоҳига эга бўлади. Яъни, база тайёр, фақат уни тартибга келтириб, реконструкция қилиш керак. Бу масалада ишлар олиб бориляпти.

- Марко Станоевич «Пахтакор»га қарши ўйинда кеч тушганди, бугун эса эртароқ тушиб, тезкорлиги юқори бўлмаса-да, ҳаракатлари билан майдон марказида тартиб ўрнатди...

- Марконинг майдон марказида тартиб ўрнатиши учун ҳам туширдик. У зарба йўллаш учун яхши имкониятга эга бўлганди, аммо негадир бундай қилмади. У ва Мираҳмадов майдонга тушиб, иккинчи қаватдаги курашларга ёрдам бера олишди. Миржаҳон рақиб вазиятини боши билан қайтариб қолди. 

- Улуғбек Ҳошимовнинг ҳолати қандай, уни яқин орада майдонда кўрамизми?

- Биз ҳам барчаси яхши бўлишига умид қиляпмиз. Клуб шифокорлари тавсияси билан уни бугун майдонга тушириб таваккал қилишни истамадик. «Сўғдиёна»га қарши ўйингача сафга қайтадими ёки йўқ, ўйингача маълум бўлади. 

- Турнир жадвали юқори қисмида жиддий кураш кечмоқда. «Насаф», «Нефтчи» ва бошқа рақобатчилар таркиби ва бюджети жиҳатдан «Динамо»дан анча каттароқ имкониятга эга экани барчага маълум. Ҳозирги ҳолатда чемпионлик учун имкониятлар қай даражада?

- Имконият барчада бир хил. Ахир, футболни пуллар ўйнамайдику! Футболчилар майдонда ўйнайди. Курашишда давом этамиз, нима бўлишини эса кузда кўрамиз. Мавсумни «Насаф»га қарши ўйин билан тугатамиз ва умид қиламанки унгача курашда қоламиз. Бугунги ўйин учун Самарқанд аҳли, мухлисларга раҳмат. Улар бизга 12-ўйинчи сифатида қўшимча куч бермоқда ва сўнгги дақиқаларда бу жуда муҳим. Мухлисларни хурсанд эта олганимиздан жуда мамнунман, деди Вадим Карленович матбуот анжуманида.