"UFC 327" турнири мухлисларни "афсунлаб қўйди"!

АҚШнинг Майами шаҳрида ўтказилган "UFC 327" турнири якунланди. Қуйида эътибор марказидаги уч жангни таҳлил қиламиз.

Жош Хокит ва Кёртис Блэйдс. Жош UFC га бўрон мисоли кириб келди. Учинчи жангини ҳам ёрқин ўтказган ММА устаси аввалги икки баҳсларида “ёрқин перформанс”и учун бонус қўлга киритган эди. Жанг олди матбуот анжуманида ўзгача имиж билан кўриниш берган спортчи треш-токлари билан барчани ўзига қаратган эди. Блайдес эса унга жавоб бермаганди ҳам. Чунки у оғир вазн тоифасида кўп нарсани исботлаб бўлган, рейтингда эса бешинчи поғонани эгаллаб турганди. Ҳануз рейтингга ҳам киритилмаган янги жангчини менсимаганди. "Менга пул ва жанг керак, шунинг учун октагонга чиқяпман", деб қўйганди, холос. Хокит эса сўкингани сўкинган, шоу қилароқ ҳамманинг асабини бузаётган эди. Қисқаси, Блэйдс баҳсга катта фаворит сифатида ташриф буюрганди.

Тўқнашув пайти устунлик гоҳ у тараф, гоҳ бу тарафга ўтди. Аммо яққол устунлик Жошда эди. Кёртиснинг юзи қонга беланган, боқса, кишининг раҳми келаётганди. Хокит бу ҳам етмаганидек рақибини октагонда ҳам мазаҳ қилди. Якун эса сизга аён.

Хуллас калом, Жош чақмоқ тезлигида ўсиш қайд этмоқда. Яна иккита жангдан кейин камар йўли ҳам очилиши мумкин. Ҳозир профессионал ММАдаги рекорди 9-0 бўлиб турибди.

Азамат Мурзаканов ва Пауло Коста. Жанг олдидан россиялик спортчи агар обуначиларим 100 мингдан ошса, бразилия байроғи билан чиқиб келаман, деб айтганди, лекин 150 минг бўлиб кетди. Шундан сўнг у рақибининг байроғи билан чиқмаслик учун бошқа баҳоналар ўйлаб топди. Коста эса матбуот анжуманида фаол бўлган жангчилардан бири эди ва ҳатто инглиз тилини билмайдиган Азаматни гапиртирмади ҳам. Ўтган сафар Роман Копиловни мағлуб қилган спортчи бу сафар Азаматни енгишини, кейин навбат Хамзатга келишини айтиб ўтганди. Ҳозир 2/2 100% лик натижа.

Пауло жанг вақти рақибининг бош қисмига бир неча бор яхшигина зарба йўллади ва охири нокаут қилди. Инсон баъзан ичидаги важоҳат, шижоат ва энергияни ташқарига чиқариб туриши керак. Сокинлик билан юриб, "ҳаммасини жангда гаплашамиз", дейиш баъзан спортчининг зарарига ўйнаши ҳам мумкин.

Карлос Улберг ва Иржи Прохазка. Кечанинг марказий тўқнашуви.  Жанг стартидаёқ Прохазка оёқ зарбалари билан ҳужумга ўтди ва Ульбергни бир неча бор мувозанатдан чиқарди. Ага Иржи яна бир-икки марта ўша нуқтага зарба беришга улгурганда эди... жанг бутунлай бошқача тугарди.

Ульбергни бу кетдишда Иржига рақобат қила олмайди, чехиялик ғалаба қозониб бўлди, деб турган пайтимиз, Карлоснинг ичидаги йиртқич ҳайвон уйғонди. Аввал у чап хук зарбаси билан рақибини йиқитди, ортидан партерда дўппослади. Биринчи раунднинг ўзидаёқ янги зеландиялик бутун дунёга мен борман, деб ҳайқирди.

Алқисса, муаммолар жуда катта бўлса ҳам, енгилгандек туйилсангиз ҳам, сира таслим бўлманг, зеро ҳамма нарса "тугади", деб ўйлаган жойингиздан бошланади!

Азизбек ҒОЗИЙ тайёрлади