У бизга келади! “Манчестер Сити” катта трансферни якунлаяпти
- 8-январ, 17:16
- Zohir Toshxo’jayev
- 0
- Футбол
“Манчестер Сити” мутасаддилари Англия Премьер-лигаси тўпурарларидан бири – “Борнмут” ҳужумчиси Антуан Семеньони ўз сафига қўшиб олишни деярли якунлади.
Куни кеча Sky Sports эфирида Жейми Реднапп ўз инсайди билан ўртоқлашиб, “Ливерпуль” ҳали ҳам Семеньони илиб кетиши мумкинлигини айтган эди.
Бироқ The Athletic нашрининг ёзишича, ҳеч қандай кутилмаган ўзгариш бўлмайди ва Семеньо фаолиятини “Сити”да давом эттиради. Шу билан бирга, “шаҳарликлар” Антуаннинг шартномасида кўрсатилган тўлиқ сотиб олиш бандини фаоллаштирмайди.
“Сити” келишувни бироз бошқача қилди. Унга кўра, манчестерликлар “Борнмут”га 62,5 миллион фунт стерлинг миқдоридаги компенсация ҳамда 1,5 миллион фунт бонус тўлайдиган бўлди.
Шунингдек, “Борнмут” Гана терма жамоаси ўйинчисини кейинги трансферидан 10 фоиз улуш ҳам оладиган бўлди.
Эришилган келишувда “Сити”га бутун тўловни дарҳол тўлашга ҳожат қолмайди. Семеньо учун маблағ 24 ой давомида босқичма-босқич тўланади.
Шу тариқа, жорий Премьер-лига мавсумида 10 та гол уриб, 3 та голли узатма берган Семеньо “Борнмут” тарихидаги энг қиммат сотувга айланади.