U-23 Осиё кубоги. Ўзбекистон захирасида қолган футболчиларда жароҳат борми? Даврон Файзиев бунга ўз муносабатини билдирди

U-23 Осиё кубоги доирасида Ўзбекистон олимпия терма жамоасининг Индонезияга қарши таркиби маълум қилинди. Унга кўра, таркибда бир қанча ўзгаришларни кўришимиз мумкин. 

Жумладан, термамиз сардори Жасур Жалолиддинов, қанот ҳимоячиси Иброҳимҳалил Йўлдошев, ҳужумчи Ҳусаин Норчаев каби футболчилар захирада қолдирилган. Кўпчилик мухлислар эса бунга жавобан "уларда жароҳат борми?", деган савол билан мурожаат қилишмоқда. Бунга жавобан ЎФА Маркетинг ва медиа бўлими бошлиғи Даврон Файзиев телеграм канали орқали ўз муносабатини билдирди. 

"Юзага келган саволларга шу жойида аниқлик киритиб кетай. Захирада қолган футболчиларда жароҳат йўқ. Улар ўйин давомида жангга қўшилиши мумкин. Бу мураббий ротацияси ва интенсив турнирда юқори темпни сақлаш учун чизиқларни янгилаб олиш билан боғлиқ", - деди Файзиев ўз постида.