Туркиядаги ўзбеклар: 61 та ўйин, битта гол!
- 30-май 2024, 21:22
- Zohir Toshxo’jayev
- 2
- Футбол
Жорий мавсум Туркия суперлигасида уч нафар футболчимиз иштирок этди. Легионерларимиз ўйнаган жамоалар мусобақа жадвалининг ўрта қаторларидан жой олди.
Sports.uz портали ўзбекистонлик футбол ишқибозлари эътиборига турк лигасидаги футболчиларимиз статистикасини ҳавола этади.
Отабек Шукуров
27 ёшли ярим ҳимоячи Туркияда тўп тепиш бўйича энг тажрибали вакилимиз ҳисобланади. Тўрт йил Бирлашган Араб Амирликларининг “Шаржа” клубида ўйнаган қашқадарёлик футболчи 2022 йили Туркияга кўчиб ўтиб, “Фотиҳ Карагюмрюк” жамоасига жойлашганди.
Отабек якунланган мавсумнинг қоқ ярмида жамоасини алмаштириб, “Кайсериспор” сафига қўшилди. Бунгача “Фотиҳ Карагюмрюк”да 15 та ўйин ўтказган ҳамюртимиз янги жамоасида яна 12 маротаба майдонга тушди.
Мавсум охирида Шукуров тўғри қарорга келгани ойдинлашди. “Фотиҳ Карагюмрюк” Суперлигани тарк этган бўлса, “Кайсериспор” 45 очко билан мусобақа жадвалида 11- поғонани эгаллади.
Отабек Шукуров бутун мавсум давомида Суперлигада умумий ҳисобда 1043 дақиқа ҳаракат қилиб, битта ассистни амалга оширди.
27 ёшли футболчимизнинг трансфер суммаси 2,5 миллион еврони ташкил қилмоқда. Унинг “Кайсериспор” билан шартномаси 2025 йилнинг 30 июнигача давом этади.
Ҳусниддин Алиқулов
Қашқадарё футболи яна бир тарбияланувчиси Ҳусниддин Алиқулов Туркия Суперлигасига ўтган ёзда “Насаф”дан йўл олганди.
25 ёшли марказий ҳимоячи “Ризеспор” билан уч йиллик шартнома имзолади. Ҳусниддин учун легионер сифатидаги дебют мавсум анча яхши ўтди.
Алиқулов турк клуби мураббийлар штабининг ишончини оқлай олди. “Ризеспор” ўзбек футболчисининг хизматидан Суперлиганинг 21 та учрашувида ва мамлакат кубогининг битта ўйинидан фойдаланди.
Ҳусниддин Алиқулов ҳаммаси бўлиб майдонда 1377 дақиқа ўйнади ва тўртта сариқ карточка олди. “Ризеспор” Суперлига 50 очко билан тўққизинчи ўринда якунлади.
Ўзбекистонлик футболчининг амалдаги шартномаси 2026 йилнинг ярмигача тузилган ва ҳамюртимиз 1,2 миллион еврога баҳоланяпти.
Азизбек Турғунбоев
Наманганлик футболчи январь-февраль ойларида Қатарда ўтган Осиё кубогидаги ажойиб ўйинлари самарасида Туркия клуби назарига тушди. “Сивасспор” раҳбарияти “Пахтакор” билан шартномаси якунланган ўйинчини эркин агент сифатида ўз сафига қўшиб олди ва бир ярим йиллик шартнома имзолади.
Янги жамоага Суперлиганинг иккинчи қисмидан қўшилган 29 ёшли ҳужумкор футболчи 12 та баҳсда майдонга тушди ва жами 812 дақиқа ҳаракат қилди.
Азизбек Турғунбоев “Истанбулспор” билан бўлган баҳсда Туркия чемпионатидаги дебют голини урди.
Жами 54 очко жамғарган “Сивасспор” мавсумни еттинчи ўринда якунлади.
Transfermarkt ҳамманинг эътиборини Файзуллаевга қаратди!