Тўрт юлдуз “Барса” учун шартномадан воз кечди

Германиялик мутахассис Ханс-Дитер Флик Испания чемпионига айлантирган “Барселона”да ўйнаш истагида бўлган футболчилар сони тобора ошиб бормоқда.

Каталонияликлар ҳам улардан бир нечтасининг атрофидаги вазиятни кузатиб боряпти. “Барселона”нинг асосий трансфер нишони “Ливерпуль”ни тарк этиб, Флик жамоасига қўшилишни истаётган Луис Диас ҳисобланади.

Бундан ташқари “Барса” мутасаддилари яна уч нафар ҳужумкор футболчини нишонда ушлаб турибди.

Mundo Deportivo нашрининг ёзишича, “Атлетик” юлдузи Нико Уильямс, “Манчестер Юнайтед”га керак бўлмай қолган Маркус Рэшфорд ва ПСВ билан шартномаси якунланаётган Иван Перишич фаолиятини Каталонияда давом эттириши мумкин.

Бу футболчиларнинг бари “Барселона”га ўтиш учун бошқа клублар таклиф қилаётган даромадли шартномаларни қабул қилмаяпти. Улар Ханс-Дитер Флик бошқарувидаги жамоа яқин келажакда Европада етакчилик қилишига ишонмоқда ва тақдирини айнан “Барселона” билан боғламоқчи.