Тонали қишда "Ньюкасл"ни тарк этмайди
- 2-феврал, 23:42
- Bilolbek Imomov
- 0
- Футбол
"Ньюкасл" ярим ҳимоячиси Сандро Тонали январь ойида жамоани тарк этмайди.
Аввалроқ "Арсенал" Италия терма жамоасининг 25 ёшли футболчисини қишки трансфер ойнаси сўнгги кунида сотиб олиш имкониятини ўрганаётгани ҳақида хабарлар тарқалган эди.
"The Athletic" нашрининг маълумотига кўра, футболчининг агенти Тоналини "Арсенал"га таклиф қилган, бироқ "Ньюкасл" билан музокаралар ўтказилмаган ва трансфер ойнаси ёпилгунча вазият ўзгармайди.
Италиялик ўйинчининг вакили "Арсенал" спорт директори Андреа Берта билан боғланган. Тонали "тўпчилар"га анчадан бери ёқади. Берта бу масалани хизмат вазифаси доирасида кўриб чиққан, аммо жараён давом этмайди.
"Ньюкасл" айни пайтда ҳеч қандай битим тузишни истамаяпти. Назарий жиҳатдан сўралаётган сумма ҳам лондонликлар молиявий имкониятларидан анча юқори экани айтилмоқда.
Клублар ўртасида расмий мулоқот бўлмагани сабабли Тонали "Сент-Жеймс Парк"да қолади.
Инсайдер Фабрицио Романо ҳам Сандронинг қишки трансфер ойнасида кетиши умуман кўриб чиқилмаганини таъкидлаган. Бир нечта клублар қизиқиш билдирганини инобатга олсак, ёзда жамоа позициясига қараб вазият ўзгариши мумкин. Аммо ҳозирча бу масала кун тартибида эмас.