Ливан терма жамоасида уч та учрашув ўтказган Муҳаммад Атви бошига ўқ тегиб олган жароҳати оқибатида ҳаётдан кўз юмди.
Кўнгилсиз воқеа шу йилнинг 21 август куни содир бўлган эди. Ўшанда Бейрутда юз берган портлаш қурбонларидан бирининг дафн маросимига йиғилганлар марҳумнинг хотираси учун осмонга қарата ўқ узди. Кутилмаганда, яқин ўртадан ўтиб кетаётган футболчининг бошига дайди ўқ келиб тегди.
Футболчи зудлик билан шифохонага етказилиб, сунъий комага солинди. Кўрсатилган тиббий ёрдамга қарамай, Муҳаммад Атви 18 сентябрь куни жон берди.
Атви фаолияти давомижа ўз юртининг “Ал-Ансор”, “Тадамон Сур” ва “Ахаа Аҳли” жамоаларида тўп сурган ва Ливан терма жамоасига ҳам жалб этилган эди.
- Бу нафақат Атвилар оиласи, балки клубимиз учун ҳам катта йўқотиш. У жамоа етакчиси сифатида мухлислар қалбидан жой олган эди. Жамоамиз учун жуда кўп нарса бера олган футболчи эди, - деб баёнот берди “Ал-Ансор” клуби.