Теннисчимиз Туркиядан иккинчи совринни олиб кетмоқчи

Туркиянинг Анталия шаҳрида M25 таснифига кирувчи халқаро теннис турнирида ҳамюртимиз Сергей Фомин яккалик баҳсларини ғалаба билан бошлади.

Теннисчимиз мусобақанинг биринчи даврасида германиялик Том Генч билан рақобатлашди. Учрашувнинг биринчи сетида бор йўғи 3 та геймни бой берган Сергей, иккинчи сетда рақибига ҳеч қандай имконият қолдирмади. Шу тариқа, иккинчи даврага йўл олган С.Фомин чорак финал йўлланмаси учун франциялик Шон Куэнин билан куч синашадиган бўлди.

Шунингдек, Сергей Фомин турнирнинг жуфтлик баҳсларида нейтрал теннисчи Павел Вербин билан тандемда чехиялик Зденек Колар ва австриялик Сандро Копп жуфтлиги билан баҳс олиб боради.

Эслатиб ўтамиз, мамлакатимизнинг иккинчи рақамли теннисчиси бўлган Сергей Фомин ўтган ҳафтада Анталияда ўтказилган нуфузли мусобақада бош совринни қўлга киритган эди.