Суперлигадаги чемпионлик, "Пахтакор"дан келган таклиф ва тўпурарлар пойгасидаги имконияти ҳақида Силванус Нимели билан катта интервью!

Жорий мавсум кашфиётига айланган "Сурхон" жамоаси ҳужумчи Силванус Нимели кўплаб ишқибозлар назарига тушгани рост. SPORTS.uz сайти кузатувчилари учун Либериялик форвард билан катта суҳбат уюштирдик. Унда, унинг карераси, ўзбекча сўзлаётгани ва "Пахтакор"га ўтиши мумкинлиги бораисдаги фикрлари билан танишасиз.

Сильванус Нимели нима учун Ўзбекистон вариатини танлади? Унда бир нечта таклифлар бор эди-ку?!

- Тўғри, менда бир нечта таклифлар бор эди. Шунга қарамай, мени доим футболчи сифатида ўсишим, янги даражага кўтарилишим кўпроқ қизиқтирган. Агентим "Сурхон" варианти бор эканлигини айтиб менга қўнғироқ қилганида, бу мен кутган жиддий чорлов эканлигини тушундим. Жамал Акаев (агенти) яхши инсон ва ўз ишининг устаси. У билан танлов олдидан маслаҳатлашиб олдик. Кўп ўтмай, "Сурхон" бош мураббийлари ( Сергеи Султанович Токов & Сергеи Сергеевич Арсланов) билан суҳбатлашдим. У нима бўлган тақдирда ҳам менга ишониши ва ёрдам бермоқчи эканлигини айтди. Профессионал футболчи учун кўмак қўлини чўзишга тайёр мураббийларнинг жамоада бор эканлиги жуда муҳим. Айнан шу омиллар сабабли "Сурхон"ни танладик. Кўриб турубсизки, адашганимиз йўқ.

Бу ерга келаётганингизда Ўзбекистон футболи ҳақида нималарни билар эдингиз? Ўзбек футболи ҳақидаги қайси фикрларингиз тўғри чиқди, қайси фикрларда адашдингиз?

- Ўзбек футболи ҳақида жуда кўп бор эшитганман. Сабаби, кўплаб дўстларим Осиё қитъасида тўп сурган. Улар менга бир неча бор бу қитъага кўчиб ўтишимни, шу ерда профессионал карьерамни давом эттиришимни таклиф қилишган. Ёш бўлганим боис, кўпроқ ўйин амалиётига эга бўлишни афзал кўрганман. Фаолиятим давомида кўплаб мамлакатларда тўп сурдим. Етарлича тажриба тўпладим. Ўзимни бу чақирувга тайёр эканлигимни ҳис қилгач, Ўзбекистонга кўчиб ўтишга қарор қилдим.

Москванинг "Спартак" клубида тўп сурган чоғларим, Остон Ўрунов жамоага келиб қўшилди. У майдонда шунчаки фантастик ўйин намойиш этар эди. Айнан шу сабабли Ўзбекистон футболини секин-аста кузатишни бошлаганман.

"Сурхон" клуби сафида ажойиб мавсум ўтказмоқдасиз. Сиз билан "Пахтакор" қизиқиб қолганидан хабарингиз борми? Ўзбекистондаги режаларингиз қандай? Мамлакатимиз ёқдими ёки биринчи имкон бўлиши билан уни тарк этмоқчимисиз?

- Чемпионат тугашига бир нечта ўйин қолди. Қилиниши керак бўлган ишлар жуда кўп. Барча футболчилар сингари мен ҳам, жамоам ва ўзим учун энг яхшисини илинаман. Бизда яхши мураббийлар штаби мавжуд. Олдиндаги барча баҳсларда ғалаба учун майдонга тушамиз.
"Пахтакор" "Насаф", "Навбаҳор" ва "Нефтчи" сингари яхши ва жуда катта жамоа. Менимча, ҳар қандай ёш футболчи учун бундай жамоада тўп суриш орзу. Менга ҳали, "шерлар"дан тушган таклиф борасида ҳеч ким ҳеч нарса айтгани йўқ, аммо бу футбол. Унда ҳамма нарса бўлиши мумкин. Менга, Суперлига манзур келди ва Ўзбекистонда ўзимни яхши ҳис қиляпман. Ҳозир бор эътиборимни чемпионатни аъло даражада якунлашга қаратганман. Бош мақсад "Сурхон"га қўлимдан келганича ёрдам бериш! "Учар тулпорлар" билан яна бир йиллик контрактим бор. Бу омил мен учун жуда муҳим. Аввалроқ айтганимдек, футболда нима бўлишини олдидан башорат қилиш мушкул. Шунга қарамай, ҳозир "Сурхон"да футболдан лаззат оляпман. Бу спортичининг ҳаётидаги энг муҳим омиллардан бири!.

Ҳозир Суперлига авжига чиқмоқда. Қайси жамоани чемпионлик учун имкониятларини яхши деб ўйлайсиз?

- Дарҳақиқат, ички биринчилик ўзининг энг қизғин палласига кирган. Жамоалар финишга яқинлашгани сари, ўзининг энг яхши ўйинини намойиш этишга ҳаракат қилмоқда. "Пахтакор" ҳозир турнир жадвалини бошқариб бормоқда, аммо олдинда ўйинлар кўп. Жамоаларнинг жадвалдаги ўрнига назар ташлар экансиз, кимнидир олдиндан чемпион деб аташнинг имкони йўқ. "Навбаҳор", "Насаф" охиригача "жанг" таклиф этишига шубҳам йўқ. Нима бўлишини яна 4-5 турдан кейин билиб оламиз.

Ўзбекистон футбол мухлислари ҳақида фикри қандай?

- Мухлислик аъло даражада. Менга, "Сурхон" жамоасининг ишқибозлари жуда ҳам ёқади. Улар ўйинларда бизни доим қўллаб-қувватлаб туради. Ишқибозларнинг жамоамиз натижаларида тутган ўрни беқиёс.

Тил борасида муаммолар юзага келмаяптими? Қандай ўзбекча сўзларни ёдлаб олишга улгурдингиз?

Бу борада муаммо юзага келгани рост. Сабаби, бу тилни биринчи маротаба эшитяпман. Шунга қарамай, жамоамизда деярли барча рус тилида сўзлаша олади. Мен 5 йил Россияда тўп сурганимни ҳисобга олсак, ҳеч қандай муаммо йўқ. Ҳозирда, ўзбекча сўзларни ҳам ўрганиб боряпман. Секин-аста ўзбекча тушунишни ва оз-оз бўлсада сўзлашишни бошласам ҳайрон қолманг. Бу тил мен учун жуда қизиқ. Шу боис, унда эркин сўзлашишни истайман. Аллақачон ( қалайсиз? раҳмат, яхши) бир нечта сўзларни ўрганиб олдим ва муомалада ишлатяпман.

Бугунги ўзбек футболи ҳақидаги фикрингиз қандай? Биз ривожланяпмизми ёки регресс кўзга ташланяптими?

Ўзбек футболи ривожланмоқда дейиш адолатдан бўлади. Сабаби, ҳозир 4 та клубимиз Осиё чемпионлар лигасида иштирок этмоқда. Бу ҳар қандай чемпионат учун аъло даражадаги натижа. Агар адашмасам, сўнгги бор бундай холат 2016 йилда содир бўлган эди...

Айни дамда, "Суперлига"даги ўзини ҳайрон қолдирган 3 та футболчи ким эканлигини санаб беринг?

Бу ерда иқтидорли футболчи жуда кўп. Ҳозир тузадиган учлигимда уларнинг йўқлиги, кучсиз футболчи эканлигини англатмайди. Шунга қарамай, саволингизга жавоб бераман.

Биринчи бўлиб асосий дарвозабонимиз - Артём Потаповни эътироф этган бўлар эдим. Унинг ўз ишини аъло даражада бажариши ҳеч кимга сир эмас. Шунингдек, энг тажрибали ҳужумчи - Драган Черанни ҳам рўйхатга киритаман. У зўр йигит ва 36 ёшда эканлиги майдонда ҳеч ҳам сезилмайди. Учликни Остон Ўрунов якунлаб беради. У жуда ҳам иқтидорли. Унда, мамлакатингизни энг зўр футболчиси бўлиб етишиш учун барча имкониятлар мавжуд.

"Сурхон"дан жорий мавсумда нима кутсак бўлади?

Барча кўриб турганидек, "Сурхон" ўйиндан-ўйинга очилиб бормоқда. Бугунги даражага эришиш учун мавсум бошидан бери меҳнат қилиб келяпмиз. Ҳозир ҳам, ҳар куни машғулотлар чоғида боримиз беряпмиз. Интилиш эвазигача қаерга қадар етиб бориш мумкинлигини билмоқчимиз. Бундай ёш жамоада прогресс ва хатоларнинг бўлиши табиий. Ҳар бир ўйинда ишқибозларни хурсанд қилиш учун ҳаракат қиляпмиз.

Тўпурарлар пойгасида иштирок этяпсиз. Бу пойгадаги имкониятларингизни қандай баҳолайсиз?

Черан ва Хебай ҳисобида 11 та гол мавжуд. Бу жуда ёқимли натижа, бироқ ҳозир бор эътиборим майдондаги ҳаракатларимда. Агар бу масалада сўз борса, имкониятларим ёмон деб ўйламайман. Барчаси қолган ўйинлардаги натижаларга боғлиқ.

Либерияда Ўзбекистон ҳақида билишадими? У ердаги дўстларингизни юртимиз ҳақида нималарни айтиб бердингиз?!

Албатта. Мен оила аъзоларим ва дўстларим билан бу масалада жуда кўп суҳбатлашаман. Улар Ўзбекистонни нафақат футболда, балки бошқа спорт турларида ҳам жуда кучли эканлигини яхши билади. Бу жуда қизиқ ва ёқимли ҳикоя.

Яҳёхўжа Улуғхўжаев суҳбатлашди