"Суперлига-2026". Тақвим режаси клублар билан келишилди
- 8-январ, 11:12
- Shuhratbek Jo’rayev
- 0
- Футбол
ЎзПФЛ янги мавсум учун тақвим режасига доир муҳим маълумотни тарқатди.
Унга кўра, 25 декабрь куни ассоциация миллий терма бош мураббийи Фабио Каннаваронинг "ЖЧ-2026" учун режасини лигага тақдим этди. Эндиликда май ойининг 5-санасидан бошлаб Суперлига учрашувларини ўтказиш имконияти мавжуд эмас. Шу тариқа лига август ойидаёқ ишлаб чиқилган тақвим режасини ўзгартиришга мажбур бўлди.
Биз 24 соат ичида янги режани клубларга тақдим этдик ва улар белгиланган муддатда янги тақвимга розилик билдирди. Миллий жамоа 5 май санасидан эътиборан маҳаллий футболчилар иштирокида йиғинга киришади ва 10, 17, 24 май кунлари Суперлиганинг етакчи клубларига қарши ўртоқлик ўйинларида иштирок этади. Жараён июнь ойидаги ФИФА кунлари ҳамда жаҳон Кубогига уланиб кетади.
Май, июнь, июль ойлари давомида катта танаффус юзага келаётгани, бу Суперлига яхлитлигига таъсир кўрсатаётганлигини инобатга олган ҳолда май ойининг қолган қисми Ўзбекистон кубоги билан давом эттирилади.
Ўз навбатида лига "Осиё кубоги-2027" яқинлашиб келаётганлигини ҳам ҳисобга олди. Бош жамоага номзод футболчиларнинг декабрь ойи давомида қисқа таътилга чиқиши ва кейинчалик Осиё кубоги олдидан йиғинларга киришиши долзарб масала ҳисобланади. Шуни инобатга олган ҳолда "ЖЧ-2026" якунидан кейинга режа қилинаётган мавсумнинг иккинчи қисми 20 июль санасидан давом эттирилади.
Суперлиганинг сўнгги тури 3 декабрь санасига тўғри келади. Ўтиш ўйинлари ва Ўзбекистон кубогининг ярим финалида иштирок этмайдиган клублар шу санадан кейин танаффусга йўл олади. Ўтиш ўйинидан жой олган жами тўрт учрашув қисқа вақт ичида ташкил этилиши, оғир мавсумдан кейин клублар учун эҳтимолий рақиблардан келиб чиқадиган локация билан боғлиқ муаммоларни енгиллаштириш, футболчиларнинг учрашувлар оралиғида тикланиш имкониятларини ҳисобга олиб, марказлаштирилган ҳолда Тошкентда ўтказилади.
Ёзги трансфер ойнаси 22 июнь — 24 июль саналари оралиғига тўғри келади. Мазкур даврда клуб сафига келиб қўшилган янги футболчининг қайдномага киритилишига Суперлиганинг 14-туридан эътиборан рухсат берилади.