SPORTS.uz'да жаҳон чемпионати кундалиги (8-сон)

Қатарда жаҳон чемпионати давом этмоқда. SPORTS.uz сайти ижодкорлари ушбу мундиал кундалигини тақдим этади.

Камерун - Сербия голлар бой учрашув. Бу ўйинда ҳаммаси бор, ирода, чиройли голлар, қайтиш ва ҳоказо. Бир сўз билан айтганда, мухлислар ғалаба қозонган беллашув

Жанубий Корея дастлаб 2 та гол ўтказиб юбориб, кейин мувозанатни тиклаганди. Бироқ қитъадошларимизнинг хурсандчилиги узоққа чўзилмай, мағлубиятга учради.

Бразилия кўп бора тўқнаш келадиган ноқулай рақибини енгди. Аммо бу осон бўлмади. Неймарнинг ўрни мана шундай ўйинларда билинар экан.

Португалия Уругвайдан аввалги мундиалдаги мағлубият аламини олди. Криштиану гол урдим деб ўйлаган вазиятда Фернандеш муваффақият қозонди. Ҳа айтганча, бу икки футболчи орасига совуқчилик тушган деб ўйлаганлар, адашади.

Камерун - Сербия 3:3

Қатардаги мундиални безаб берган ўйин Камерун ва Сербия терма жамоалари ўртасида бўлиб ўтди. Голларга бой ўтган мазкур тўқнашувда жамоалар жанговор дурангга имзо чекди.

Биринчи гол 29-дақиқада Кастелето томонидан киритилди. У бурчак зарбасидан сўнг қулай нуқтада пайдо бўлди ва бўш қолган дарвозани ишғол этди. Биринчи таймга қўшиб берилган дақиқада Павлович боши билан тўпни Камерун дарвозасига киритиб қўйди - 1:1. Икки дақиқа ўтиб эса Милинкович-Савич узоқдан кучли зарба йўллаб, Сербияни ҳисобда олдинга олиб чиқди. Бу биринчи бўлимда урилган сўнгги гол эди.

Иккинчи таймда, аниқроғи, 53-дақиқада "Фулхэм" ҳужумчиси Митрович аниқ зарбаси билан сербларни 3:1 ҳисобида олдинга чиқиб олишига замин яратди. 10 дақиқа ўтар-ўтмас, Абубакар беллашувдаги 5-гол муаллифига айланди. У дарвозабон билан бирга-бир вазиятда тўпни посбоннинг устидан ташлаб қўйди.

Аммо бу ҳали ҳаммаси эмас эди. 66-дақиқа ўтиб бораётган бир вақтда Чупо-Мотинг шеригининг ажойиб узатмасидан кейин тўпни дарвозага киритди ва таблода ҳисобнинг 3:3 кўринишга келишини таъминлади.

Бундан олдин Сербия Африка жамоаларига қарши ўйинларда икки мағлубиятни қабул қилиб олганди. 2006 йилда Кот-д'Ивуар, 2010 йилда эса Гана европаликларни таслим этган.

Винсент Абубакар 2022 йилда 11 голда иштирок этди. У 9 беллашувда 9 гол ва 2 ассист қайд этган. Шунингдек, ҳужумчи фаолиятида Мундиалдаги дастлабки голини урди.

 

Жанубий Корея - Гана 2:3

Иккинчи учрашув ҳам шиддат борасида дастлабкисидан қолишмади. Ўта юқори темпда ўтган Жанубий Корея - Гана баҳси 3:2 ҳисобида африкаликларнинг ғалабаси билан якун топди.

Салисунинг 24-дақиқада урган голи сабаб беллашувда ҳисоб очилди - 0:1. У кореяликлар жарима майдонидаги тартибсизликдан унумли фойдаланди. 34-дақиқа ўтиб бораётган бир пайтда Қудус тўпни боши билан тўрга йўллади - 0:2.

Иккинчи тайм бошларида Чо Гю Сон боши билан гол урди ва ҳисобни қисқартирди. Орадан ҳеч қанча вақт ўтмай, яна шу футболчининг ўзи худди илк голдаги каби тўпни дарвозага киритди. Бироқ қитъадошларимизнинг хурсандчилиги узоққа чўзилмади. 68-дақиқада Қудус яна катта саҳнага чиқди. У кореяликлар жарима майдончасида қулай нуқтада ҳозир бўлди ва учрашувга нуқта қўйди.

Чо Гю Сон мундиалда икки маротаба боши билан гол урган ягона футболчи бўлиб турибди. Қизиғи, у ушбу кўрсаткични атиги 3 дақиқа ичида амалга оширди.

Жордан Айю мазкур тўқнашувда 2 голли узатма муаллифига айланди. У дастлабки икки голда ассистентлик вазифасини бажарди.

Гана ушбу баҳсда аниқ берилган 3 зарбасининг барчасини голга айлантирди. Португалия билан ўйинда африкаликлар 3 та аниқ зарбадан 2 та тўп киритишга эришганди.

 

Бразилия - Швейцария 1:0

2-тур доирасидаги "G" гуруҳи вакиллари - Бразилия ва Швейцариянинг ўзаро тўқнашувида биргина гол учрашуви тақдирини ҳал қилди. 5 карра жаҳон чемпионлари ўзлари учун ноқулай рақибни 1:0 ҳисобида мағлуб этди.

Иккинчи таймда Ришарлисон тўпни Каземирога узатди. У эса биргина пас орқали Винисиусни яккама-якка вазиятга чиқарди. Вини ҳисоб очди. Аммо VAR вазиятни такрор кўргач, Ришарлисон тўпни эгаллаб олган вазиятда ўйиндан ташқари ҳолатда экани маълум бўлиб, гол бекор қилинди.

83-дақиқа келиб Бразилия ўз мақсадига эришди. Каземиронинг кучли зарбасини Зоммер қайтара олмади.

Шу тариқа, бразилияликлар очколари сонини 6 тага етказиб олди ва плей-офф масаласини муддатидан олдин ҳал этди. Бразилия кейинги босқичга Франциядан кейин йўл олган иккинчи жамоа бўлди. Бразилия мундиаллар тарихида 9 марта плей-оффга йўл олди. Охирги марта улар 1982 йил плей-оффга чиқа олмаганди. Бразилия дарвозасига ЖЧ-2022даги икка ўйинда ҳам рақиблар бирорта аниқ зарба бера олмади.

 

Португалия - Уругвай 2:0

Португалия ва Уругвай терма жамоалари ўртасидаги ўйинда европаликлар 2:0 ҳисобида ғалаба қозонди. 

Бруну Фернандеш 54-дақиқада Криштиану Роналдуга ҳаводан тўпни оширди. Бир қарашда Роналду боши билан тўпни дарвозага жойлагандек туюлди. Бироқ такрорий лавҳаларда маълум бўлдики узатма голга айланиб кетган. Стадион сухандони ҳам Бруну номини эълон қилди, тўп Роналдунинг бошига тегмаган деб топилди. 

Португалияликлар ўйинга қўшиб берилган дақиқада пенальти ишлашди. Бу вақтга келиб Криштиану захирага олинганди. Шу боис 11 метрли нуқтадан Фернандеш аниқ фойдаланиб, жамоага ғалаба тақдим этди. Учрашувдаги икки гол ҳам Бруну Фернандеш номига ёзилди.

Энди Португалия 2-турдаёқ плей-офф масаласини ҳал этган Франция ва Бразилия билан бир қаторда.

Криштиану Роналду Португалия сафида 5 та жаҳон чемпионатининг 4 тасида гуруҳдан чиқди ва фақатгина бир маротаба 2006 йил нимчорак финалдан ўта олган.

Португаллар ЖЧ-2006дан сўнг илк бор мундиални кетма-кет 2 ғалаба билан бошлади.