SPORTS.uz Белград-2021. Реванш олинмади. Афсуски, Шаҳрам Ғиёсов ютқазди

Сербиянинг Белград шаҳрида бокс бўйича эркаклар ўртасидаги жаҳон чемпионати ўзининг қизғин палласига кириб бормоқда. 

Бир неча дақиқадан сўнг терма жамоамиз учун куннинг охирги жанги бошланади. Унда Шаҳрам Ғиёсов (-71 кг) қозоғистонлик Асланбек Шимбергеновга рўбарў келади. Икки боксчининг аввалги тўқнашувида Шимбергеновнинг қўли баланд келганди.

Жанг бир неча дақиқадан сўнг бошланади. Ушбу тўқнашувни "Узрепорт" телеканалида жонли эфирда томоша қилишингиз мумкин!

Боксчилар рингга чиқиб келишди. Шаҳрам Ғиёсов кўк либосда, рақиби эса қизил формада ҳаракат қилади.

Биринчи раунд бошланди.

Шаҳрам Ғиёсов профессионал боксга ўтгани барибир таъсир ўтказмоқда. У битта битта зарбалар бермоқда. Унинг рақиби эса иккилик ва учлик зарбалар йўллаяпти. Ажойиб раунд гувоҳига айландик. Биринчи раунд қозоғистонлик боксчининг фойдасига - 5:0.

Биринчи раунд якунланди.

Иккинчи раунд бошланди.

Қозоғистонлик боксчи Шаҳрамга нисбатан аниқ зарбалар йўлламоқда. Аммо вакилимиздан фаоллик кутиб қоламиз.

Шаҳрам энди очиқ жангга киришмоқда. Қўлларини тушириб рақибга босим ўтказишга уриняпти. Аммо бу раунд ҳам қозоғистонлик Шимбергеновнинг фойдасига - 4:1.

Иккинчи раунд якунланди.

Учинчи раунд бошланди.

Энди ҳамюртимиз рақибини нокаут қилмаса бўлмайди. Кўпроқ таваккал қилиш талаб этилади. Имкон қадар кўпроқ зарба беришга уринаётган Шаҳрамга аксарият ҳолларда аниқлик етишмаяпти.

Жанг якунланди. Ҳакамлар Асланбек Шимбергеновнинг ғалабасини қайд этишди. Якуний ҳисоб - 5:0. Шаҳрам Ғиёсов илк босқичдаёқ юришини тўхтатди.