Слот Жота хотирасига бағишланган сукут пайтидаги ҳуштакбозликка муносабат билдирди

"Ливерпуль" бош мураббийи Арне Слот Англия Суперкубоги баҳси олдидан Диогу Жота ва унинг укаси хотирасига бағишланган бир дақиқалик сукут маросимида юз берган ҳолат ҳақида фикр билдирди. Слотнинг таъкидлашича, бу ҳолат атайлаб қилинмаган:

"Менимча, бу режалаштирилган иш эмас. Балки, у мухлис бир дақиқалик сукут бўлаётганини билмаган. У шунчаки хурсанд эди ва жамоасини қўллаб-қувватламоқчи бўлди. "Пэлас" мухлислари уни тинчитишга уринишди, шу уриниш ҳам шовқинга олиб келди. Шунда бизнинг мухлислар: "Эй, нима бўляпти?" деб жавоб қайтаришди.

Шу сабабли мен бунда ёмон ният бўлганига ишонмайман. Чунки "Кристал Пэлас" мухлислари ва бутун дунёдаги кўплаб футбол ишқибозлари Диогу ва Андрега катта ҳурмат билан ёндашди. Бу нотўғри, номақбул ҳолат эди, аммо ҳеч ким атайлаб қилганига ишонмайман.

Жума куни "Борнмут"га қарши ўйинда бу маросим қандай ҳурмат билан ўтади, кўрамиз. Балки, Жотанинг вафотидан кейин беш ҳафта ўтгани учун ҳам ўша мухлис бу ҳолатни унутиб қўйгандир", – дея таъриф бериб ўтди мерсесайдликлар мутахассиси.

Эслатиб ўтамиз, куни кеча "Ливерпуль" "Кристал Пэлас"га қарши (2:2, пенальтиларда – 2:3) баҳс олиб бориб, мағлуб бўлди. "Уэмбли"да ўйиндан аввал Жота ва унинг укаси Андре Тейшейра да Силва (Португалиянинг "Пенафиэл" клуби ҳужумчиси) хотираси ёдга олинди. Бироқ ҳакам Крис Кавана маросимни кичик гуруҳ "Пэлас" мухлисларининг шовқини сабабли тўхтатишга мажбур бўлди.