“Сити”дан кетмай, катта маош олавераман!
- 21-апрел 2025, 06:20
- Zohir Toshxo’jayev
- 0
- Футбол
“Манчестер Сити” келаси мавсум олдидан янги таркиб шакллантиришни мақсад қилган. Клуб раҳбарияти харидларни январь ойидаёқ бошлаб юборган.
Шунга қарамай, асосий ўзгаришлар ёзги трансферлар вақтида амалга оширилади. Ёши катта футболчилар ўзига янги иш топиши керак. Хусусан, январда Кайл Уокер “шаҳарликлар” билан хайрлашди. Кевин де Брюйне ҳам июнда жамоани тарк этади.
Кетиши кутилаётган Жек Грилиш эса, режасини ўзгартирди. Манчестерга келганидан бери ўйини кутилган даражада чиқмаётган тажрибали футболчига “Тоттенхэм” ва “Астон Вилла” иш таклиф қиляпти.
Бироқ бу икки клуб Грилишга “Манчестер Сити”чалик катта маош тўлолмайди. Айнан мана шу сабаб туфайли 29 ёшли ҳужумкор футболчи шартномаси охиригача клубдан кетмоқчи эмас.
“Шаҳарликлар” Жек Грилишни 2021 йилнинг ёзида “Астон Вилла”дан рекорд сумма – 117,5 миллион еврога трансфер қилган эди. Ҳозир 35 миллион еврога баҳоланаётган футболчининг шартномаси 2027 йилнинг ёзигача давом этади.