“Сити”да ўйнаган футболчини яна қамашмоқчи

“Манчестер Сити” клуби ва Англия миллий  терма жамоасининг собиқ футболчиси Жои Бартон яна можаро марказида қолди.

The Guardian нашри хабар беришича, Бартон бир кишини калтаклагани учун полиция томонидан қўлга олинган.

Маълумотларга кўра, ҳодиса Ливерпуль шаҳридаги гольф клубларидан бири яқинида содир бўлган.

Тергов версиясига кўра, Бартон ва яна бир гумонланувчи бир кишини уриб кетган. Жабрланувчи шифохонага ётқизилган. Унда юз ва қовурғаларининг оғир жароҳатлари аниқланган.

Бу Бартон иштирок этган биринчи жанжал эмас. 2008 йилда у бир кишига ҳужум қилгани учун қамоқ жазосини ўтаган эди.

Уч ой олдин эса интернетдаги ҳақоратли баёнотлари сабабли олти ойлик шартли жазога ҳукм қилинган.

Футболчилик фаолияти давомида Бартон “Бёрнли”, “Манчестер Сити” ва “Ньюкасл” каби клубларда ўйнаган. Шунингдек, у Франциянинг “Марсель” ва Шотландиянинг “Рейнжерс” клублари сафида ҳам тўп сурган.