Симеоне "Атлетико"даги антирекордини такрорлади

Мадриднинг “Атлетико” клуби Испания чемпионатининг ўн биринчи турида навбатдаги мағлубиятини қабул қилиб олди. Якшанба куни "матрасчилар" сафарда "Бетис"га 1:0 ҳисобида имкониятни бой бериб қўйишди.

Маълум бўлишича, бу "Атлетико"нинг жорий календар йилидаги 24-мағлубияти бўлди. Бу Диего Симеоне учун жамоа бош мураббийи сифатида ишлаган вақт давомида антирекор ҳисобланади. Бундай ҳолат Симеоне бошқарувидаги "Атлетико"да  2021 ва 2022 йилларда содир бўлган. Ўшанда ҳам жамоа йил давомида 24 та мағлубият қайд этган.

Эслатиб ўтамиз, Диего Симеоне Мадрид клубини 2012 йилдан буён бошқариб келмоқда. Унинг қўл остида жамоа икки марта Испания чемпиони бўлди ва икки марта Чемпионлар лигаси финалида ўйнади.