Шуҳрат Муҳаммадиев нега жароҳатини 1 йилдан ошиқроқ вақт даволагани, майдонга қайтганида бошқа жойда ўйнаши ва футбол соғинчи ҳақида

“Локомотив” ҳимоячиси Шуҳрат Муҳаммадиев ўтган йил “Насаф” билан кечган баҳсда оғир жароҳат олиб майдонни тарк этганди.

6 июнь куни “Локомотив” - AГМК ўртоқлик учрашувида Шуҳрат Муҳаммадиев бир йилдан зиёд танаффусдан сўнг майдонга қайтиш билан бирга ўзи учун янги чап қанот ҳимоясида тўп тепди. Клуб матбуот хизматига берган интервьюсида Муҳаммадиев дастлабки таассуротлар ҳақида тўхталди.

- Бир йилдан сал кўпроқ вақт ўтиб яна майдонга қайтдингиз

- Футбол ўйнашим ўзим кутгандан ҳам чўзилиб кетди. Лекин асосийси яна яшил майдонга қайтдим ва бундан жуда хурсандман. AГМК билан ўртоқлик учрашувида бир бўлим ҳаракат қилдим. Тўғриси, анча пайт ўйнамаганим учун ҳаяжон сезилди.

- Бу ўйинда бош мураббий сизни чап қанот ҳимоясида синаб кўрди

- Ҳа, шундай. Энди бу чизиққа кўникмаганим учун баъзи вазиятларда позицион хато қилдим. Лекин барибир футболчи мураббий айтган жойда ўйнаб ўзини кўрсатишга ҳаракат қилади. Машғулотларда ҳам чап қанот ҳимоясида синаб кўришяпти. Тез орада ўйнаб кетаман, деб умид қиламан.

- Жароҳатдан қутилиб сафга қайтиш анча чўзилиб кетгандек?

- Ўтган йил май ойида жароҳат олган бўлсам, кузга бориб майдонга қайтишимни айтишганди. Бироқ икки бор операция столига ётишга мажбур бўлдим. Биринчи операциям яхши ўтмаган экан, иккинчи бор яна операция қилдиришга тўғри келди.

- Расмий ўйинларда ҳам чап қанотда ўйнашга тўғри келса, бу сиз учун қийин бўладими?

- Aлбатта, осон бўлмайди. Чунки бунгача тўрт йил “Машъал”да ва яна тўрт йил “Насаф”да фақат ўнг қанот ҳимоясида тўп тепганман. “Локомотив”га келганимдан бери ҳам ўнг қанотда ўйнаб келаётгандим. Лекин барибир бош мураббийимиз кўрсатмасига амал қилишим керак. Чунки майдонда футболчи ўйнайдиган жойни мураббий белгилаб беради.