Шомуродовнинг кетиш қарори тўғри бўлиб чиқди!
- 16-май 2022, 19:01
- Zohir Toshxo’jayev
- 3
- Футбол
“Женоа” ўзбекистонлик футбол мухлислари бегона эмас. Генуя клуби Элдор Шомуродовнинг кучли бешлик чемпионатларидаги биринчи жамоаси сифатида биз учун қадрли бўлиб қолаверади.
Италия футболининг энг кеча клуби бўлган “Женоа” 2020 йилнинг октябрида Элдор Шомуродовни “Ростов”дан трансфер қилгавн эди. Ўшанда генуяликлар Европа томонларда ҳеч ким танимайдиган ва Россия чемпионатидаги голсиз серияси узоқ чшзилиб кетган ўзбек футбочиси учун қўшимча бонуслар билан бирга қарийб 9 миллион евро харажат қилган эди.
Шомуродов бир мавсум бу жамоада ўйнаб, итальянча футболни ўрганди, генуяликлар учун саккизта гол уриб, “Ювентус” ва “Рома” каби клублар эътиборига тушди.
Жозе Моуриньо дебют мавсумидаёқ ҳужуми камтарроқ бўлган жамоада тўпурарлик маҳоратини намойиш қилган ҳужумчимизни ўзи янги қабул қилиб олган “Рома”га таклиф қилишдан чўчимади.
Талабчан мухлисларга эга пойтахт клуби Европа паспортига эга бўлмаган том маънодаги ҳақиқий хорижлик футболчи учун 18 миллион евро тўлаб, уни катта клубга трансфер қилди.
Катта босим тушадиган гранд клубда Элдор бошланғич таркибга киришга қийналаётган бўлса-да, ўтган йили ёзда “Рома”га кўчиб ўтиш тўғрисидаги қарори ҳозирга келиб тўғри бўлиб чиқди.
Якунланаётган мавсумда Генуя клуби А Серияни тарк этиши аниқ бўлди. Ҳар ҳолда Ўзбекистон миллий терма жамоаси сардори ва етакчиси қуйи лигага тушиб кетганидан кўра, кам ўйнаётган бўлса-да, “бўрилар” сафида совринлар ва еврокубоклар йўлланмалари учун курашгани маъқулроқ.
“Женоа” А Сериянинг 37-турида жиддий рақиб – кучли учликда бораётган “Наполи”га тўқнаш келди. Неаполликлар ҳар қандай натижада ҳам учинчи поғонадаги жойини ўзгартирмаслиги аниқ бўлса ҳам генуяликларни аяб ўтирмади.
Рақиб майдонидаги ўйинда ўз дарвозасидан жавобсиз учта тўп олиб чиққан “Женоа” юқори дивизионда қолиш имкониятидан бутунлай айрилди ва муддатидан аввал қуйи лигага шўнғиди.
“Женоа” 22 майга белгиланган охирги ўйинда ўзидан бир поғонада юқорида турган “Кальяри”ни ютса ҳам, хавфли ҳудуддан ташқарида турган “Салернитана”га етолмайдиган бўлди.
Генуя клуби XXI асрда илк бор юқори дивизионни тарк этди. Бунгача Шомуродовнинг собиқ клуби 1994-1995 йилги мавсумда А Серияни тарк этганди. Ўтган йили ўзбек легионери ёрдамида 11-поғонани эгаллаган жамоа бу гал ўз олдига қўйилган вазифани уддалай олмади.
“Женоа” ўз тарихида тўққизчи бор В Серияда иштирок этадиган бўлди ва келаси мавсум яна энг кучли йигирмата клуб қаторига қайтишга ҳаракат қилади.
Шуларни инобатга олиб, Шомуродов қўрқмай жиддий клублар чорловини қабул қилгани тўғри қарор бўлган ва яхшиямки Генуядан кетган экан, деган хулосага келишимиз мумкин.
Элдор Шомуродов олдида эса муҳим иккита учрашув турибди. Жозе Моуриньо шогирдлари келаси мавсум Европа лигасида қатнашиш учун сўнгги турда Туринда “Торино”ни енгиши талаб этилади.
Йилнинг энг муҳим баҳси – Конференциялар лигаси финали 25 майга белгиланган. Албаниянинг Тирана шаҳрида бўладиган ҳал қилувчи беллашувда Шомуродов жамоаси Нидерландиянинг “Фейеноорд” клуби футболчилари билан беллашади.
Конференциялар лигаси ғолибига ҳам келаси йили Европа лигасида ўйнаш ҳуқуқи берилади. “Рома” олдида ана шу соврин ва УЕФАнинг иккинчи мусобақасига йўлланма олиш вазифаси турибди.
Элдор Шомуродов “Рома”га ўтганидан бери А Серия, Италия кубоги ва Конференциялар лигасида жами 37 та ўйин ўтказиб, бешта гол ва олтита ассист муаллифи бўлди.