Шомуродовга тез орада шартнома берилади!
- 5-август 2024, 17:38
- Zohir Toshxo’jayev
- 0
- Футбол
“Рома” янги мавсумга тайёргарликни Англияда давом эттиради. Жамоанинг икки аъзоси – Элдор Шомуродов ва янги ҳужумчи Артём Довбик ўз мамлакатлари элчихоналари виза олиб беришини кутаётгани айтилмоқда.
Италия матбуоти эса, 29 ёшли футболчимизнинг келажаги масаласидаги янгидан янги маълумотларни чиқармоқда.
Sports.uz портали Италия оммавий ахборот воситаларининг Элдор Шомуродов атрофидаги вазият бўйича эълон қилаётган ахборотларни ўзбекистонлик футбол ишқибозлари эътиборига ҳавола этади.
Август ойининг илк кунларидан “Рома” кириш ва чиқиш трансферларида фаолроқ ишлашига тўғри келмоқда. Жамоа 18 августга белгиланган “Кальяри” билан бўладиган биринчи тур ўйинига Англияда тайёрланар экан трансферлар оламида янгиликлар бўлиши кутиляпти.
La Gazzetta dello Sport газетаси тарқатаётган сўнгги хабарларга қараганда, “Верона”нинг Элдор Шомуродовга бўлган қизиқиши тобора ортиб бормоқда. 29 ёшли ўзбек ҳужумчиси яқиндагина Париж Олимпиадасида иштирок этиб қайтди. Энди тез кунлар ичида унинг трансфери бўйича клублар ўртасидаги ҳал қилувчи музокаралар бўлиб ўтади.
“Верона”га ҳужумчи керак. Клуба нишонида икки ҳужумчи – Роберт Бозеник ва Элдор Шомуродов бор.
Жамоага марказий ҳужумчи олиш учун вероналиклар спорт директори Шон Сольяно ҳал қилувчи қадам ташлашга тайёргарлик кўрмоқда. У келаси ҳафта “Боавишта” ва “Рома” мутасаддилари билан учрашув ўтказиб, рўйхатдаги ҳужумчиларни олишга ҳаракат қилиб кўради.
Словакиялик Роберт Бозеникни португалияликлар ўз одатига кўра, анча қиммат баҳоламоқда. Элдор Шомуродовни эса, “Рома”дан арзонроқ ёки ижарага олиш имконияти бор.
Париж Олимпиадасидан қайтган Элдор Шомуродовнинг вакиллари унга янги жамоа топиш ҳаракатида. “Верона” раҳбарияти “Рома” ҳужумчисини ўз сафига қўшиб олишдан манфаатдор.
“Рома” мутасаддилари ўзбек футболчиси трансферидан келадиган маблағни ўз мақсадлари йўлида ишлатмоқчи.
“Верона” Элдор Шомуродовга аниқ таклиф беришга тайёрлигини маълум қилди. Бу масала янги ҳафтада кўриб чиқилади ва вероналиклар уни ижобий ҳал қилиш имконига эга.
Эслатиб ўтамиз, Элдор Шомуродов 2020 йилнинг октябридан бери Италия чемпионатида ўйнаб келмоқда. Ҳозиргача “Женоа”, “Рома”, “Специя” ва “Кальяри”да тўп тепган ҳужумчимиз А Серияда 102 та учрашувда 15 та гол ва 9 та ассист муаллифи бўлган.
Ўзбек легионери УЕФА Конференциялар лигасининг илк ғолиби ҳисобланади. Шомуродов Европадаги фаолиятида эришган ягона бу совринни 2021 йили “Рома”да ўйнаган даврда қўлга киритган.