Шомуродов "Верона"га қарши ўйнамайди. Сабаби жиддий...
- 18-феврал 2022, 16:06
- Zohir Toshxo’jayev
- 0
- Футбол
А Сериянинг 26-турида “Рома” ўз майдонида “Верона”ни қабул билади. Жозе Моуриньо шогирдлари келаси мавсумда Чемпионлар лигасида иштирок этиши учун тўртинчи ўринда бораётган “Ювентус” билан орасидаги олти очколик фарқни йўққа чиқариши керак. Ҳозирча, еттинчи поғонани эгаллаб турган “бўрилар” Европа лигасида қатнашиш учун ўзидан икки очко кўп тўплаб, олтинчи поғонани банд этган “Лацио”дан ўзиб кетиши талаб этилади.
Шу боис, “Верона”га қарши ўтказиладиган тўқнашувда римликлар фақат ғалаба учун тўп тепишга мажбур. Моуриньо шогирдлари ички чемпионатда сўнгги тўртта турдан иккитасида очко йўқотди. Рақиб жамоа эса учтасида зафар қучиб, фақат Туринда “Ювентус”га ютқазди.
Италия матбуотининг ёзишича, муҳим учрашувда "Рома"нинг бир неча футболчилари, хусусан, Элдор Шомуродов қатнаша олмайди. Маълумотларга қараганда, ҳамюртимизда ва Генрих Мхитарянда коронавирус аниқланган. Манбага кўра, Карлес Перес ҳам вирус юқтурган бўлиши мумкин.
Шунингдек, Моуриньо ўзи ёқтирган шогирди Николо Дзаньоло хизматидан ҳам фойдалана олмайди. Уни жароҳат безовта қилмоқда.
Биз Элдор Шомуродов тезроқ тузалиб, майдонга қайтишини тилаб қоламиз.
Биринчи давра учрашувида “Верона” пойтахтлик “бўрилар”ни 3:2 ҳисобида таслим қилган. Бу галги баҳс 19 февраль куни Тошкент вақти билан 22:00да бошланади.
Пеллегрини икки устозининг фарқини айтди
“Рома” сардори Лоренцо Пеллегрини клубдаги устози Жозе Моуриньо ва Италия терма жамоаси бош мураббийи Роберто Манчинини солиштирди.
- Моуриньо айрим нарсаларни шундай тушунтирадики, улар миямизга сингиб кетади. Билмаган нарсаларимизни ўрганишимиз, албатта натижага ўз таъсирини ўтказади.
Манчини эса бизни ички хотиржамликка ўргатади. Шунинг учун терма жамоада майдонда бемалол мулоқот қилишимиз, хавфли вазиятларни муҳокама этишимиз мумкин бўлади. Жозе бунга йўл қўймайди.
“Рома”да мен сардорман ва масъулиятни бўйнимга олишим керак. Мендан олдин бу ишни буюк ўйинчиларн – Франческо Тотти ва Даниэле де Росси бажарган. Ҳозир улар жамоада йўқ ва уларнинг ишини муносиб давом эттириш менинг чекимга тушган, - деди Лоренцо Пеллегрини.
Лоренцо Пеллегрини жорий мавсумда пойтахт жамоасида 22 маротаба майдонга тушиб, тўққизта гол ва бешта ассист муаллифи бўлди.
Моҳир ярим ҳимоячи Италия терма жамоасида 2017 йилдан бери тўп тепмоқда. Шу кунга қадар Лоренцо 19 та учрашувда қатнашиб, учта гол урган. Манчини бошчилигида ўтган йили Европа чемпиони бўлди.
Бизга Мхитарян керак эмас
“Рома” мавсум якунланиши билан эркин агентга айланадиган Генрих Мхитарянга янги шартнома бермаслигини маълум қилган эди. Клуб ёши ўтиб қолаётган ўйинчига катта маош тўлашни истамаяпти ва унинг ўрнига ёш ижрочи олиб келмоқчи.
Арманистонлик легионерга Россия клублари, хусусан, “Спартак”дан қизиқиш борлиги ҳақида хабарлар тарқатилганди.
Хусусан, Италиянинг Calciomercato сайти россияликлар ўйинчининг агенти Мино Райолага алоқага чиқиб, ёзда футболчини трансфер қилиш масаласини муҳокама қилгани ҳақида ёзган эди.
Москва клуби бунга ўз муносабатини билдирди.
- “Спартак” Мхитарянга қизиқаётган йўқ. Бу миш-мишлар ҳақиқатдан узоқ, - деб баёнот берди клуб матбуот хизмати раҳбари Дмитрий Зеленов.
Таъкидлаш жоизки, Генрих Мхитаряннинг ўзи Донецкнинг “Шахтёри”да ўйнаган кезлари унга “Спартак”дан чорлов бўлгани ва таклифни қабул қилмаганини итнтервьюларидан бирида тан олган.
33 ёшли арман футболчиси жорий мавсумда “Рома” сафида 31 та учрашувда қатнашиб, ўз ҳисобига учта гол ва еттита голли пас ёздириб қўйди.
Мхитарян илгари “Пюник”, “Шахтёр”, “Боруссия Дортмунд”, “Арсенал” ва “Манчестер Юнайтед” шарафини ҳимоя қилган.
Тажрибали плеймейкер 2007 йилдан бери Арманистон терма жамоаси аъзоси ҳисобланади. Генрих мамлакати бош жамоаси сафида 95 та учрашувда 32 та гол урган.
