Шомуродов жамоаси бошқа жойда ўйнайди!
- 7-июн 2023, 22:31
- Zohir Toshxo’jayev
- 0
- Футбол
Италия чемпионати якунланганига бир неча кун бўлди. Бироқ А Серияда ечилмаган биргина масала қолган.
Ўттиз саккизта тур якунига кўра, охирги икки поғонани эгаллаган “Кремонезе” ва “Сампдория” келаси мавсумни қуйи лигада бошлаши аниқ бўлиб улгурди. Лекин уларга шерик бўладиган учинчи жамоа ҳозирча мавҳум.
Икки аутсайдердан юқорида турган “Специя” ва “Верона” бир хил – 31 тадан очко жамғарган. Гарчи мусобақа жадвалида “Специя” хавфли ҳудуддан ташқарида турган бўлса-да, бу уларнинг А Серияда қолишини кафолатламайди.
А Серия регламентига кўра, қайси жамоа юқори дивизиондаги ўрнини сақлаб қолиши икки даъвогар ўртасидаги қўшимча учрашувда аниқланиши лозим.
Демак, “Специя” ва “Верона” 11 июнь куни ҳал қилувчи баҳсда ўзаро тўқнашиб, масалага ойдинлик киритиб олади.
Аввалига, бу беллашув “Удинезе” жамоаси уй учрашувларини ўтказадиган Удине шаҳридаги “Дачия” аренасида ўтказилиши белгиланган эди.
Бироқ, А Серия мутасаддилари бир нечта бошқа вариантларни кўриб чиқишга мажбур бўлди. Таниқли инсайдер Ди Марционинг таъкидлашича, бунга икки жамоа ашаддий мухлисларининг бир бирига тўқнаштирмаслик ва хавфсизликни таъминлаш масаласи сабаб бўлган.
Кейин масала ҳар томонлама ўрганилиб, учрашув жойини ўзгартиришга қарор қилинди. Расмий маълумотда айтилишича, Элдор Шомуродов жамоаси ҳал қилувчи баҳсни Реджо-Эмилия шаҳридаги “Мапеи” стадионида ўтказади.
Бу аренада “Сассуоло” уй учрашувларини ўтказиб келади. Бу стадион 1995 йили қурилган ва ўз бағрига қарийб 24 минг мухлисни сиғдира олади.
“Верона” ва “Специя” ўртасидаги учрашувлар тарихи 1921 йилдан бошланган. Бу жамоалар Италия чемпионатининг учта дивизионида ўзаро тўқнаш келган. Шунингдек, Италия кубогида ҳам бир бор куч синашишган.
Умумий ҳисобда, бу жамоалар 23 маротаба тўқнаш келган. Устунлик “Верона” томонида. Бу жамоа13 та баҳсни ўз фойдасига ҳал қилган. Олти маротаба кучлар тенг келган. “Специя” ҳисобида тўрта ғалаба бор.
Эътибор томони шундаки, “Специя” ва “Верона” А Серияда ўзаро 12 та учрашув ўтказган. “Верона” ҳисобида еттита ғалаба ва тўртта дуранг бор. “Специя” юқори дивизионда “Верона” устидан қозонилган ягона ғалабаси жорий чемпионатда қўлга киритди.
“Верона” майдонидаги баҳсда Мбала Нзола рақиб дарвозасини икки марта ишғол қилиб, тарихий ғалабани таъминлади. “Специя” мезбонлик қилган иккинчи давра ўйинида ҳисоб очилмади.
“Специя” ва “Верона” ўртасидаги ҳал қилувчи учрашув 11 июнь куни Тошкент вақти билан 23:45 да бошланади.